Prokuroria e Tiranës ka nisur hetimet për sherrin e ndodhur brenda familjes mbretërore, për të cilin ekzistojnë dy versione dhe një video. Në njoftimin zyrtar thuhet se Princ Leka ka kryer kallëzim për “dhunë në familje” ndaj ish-bashkëshortes Elia Zaharia, ndërkohë që kanë nisur hetimet edhe për publikimin e pamjeve që tregojnë konfliktin mes tyre.

Deri më tani rezulton se ky material filmik është depozituar në Prokurori, pasi ka qarkulluar në media të ndryshme.

Videoja e sherrit në familjen mbretërore| Elia Zaharia-Princ Lekës: Ke prekur babin tim që të ka mbajtur me bukë?! Diplomat i ke falsifikuar

“Prokuroria Tiranë nis hetimet për Veprën Penale ‘Dhunë në Familje’ pas denoncimit të shtetasit L.Z., verifikime edhe për publikimin e videos, provë materiale. Në Prokurorinë e Gjykatës së Shkallës së Parë të Juridiksionit të Përgjithshëm Tiranë më datë 06.03.2024, ora 15.00 është referuar nga Komisariati i Policisë Nr.1 materiali kallëzues i shtetasit L.Z për veprën penale “Dhuna në familje”, parashikuar nga neni 130/a i Kodit Penal.

Prokuroria pranë Gjykatës së Shkallës së Parë të Juridiksionit të Përgjithshëm Tiranë, regjistroi kallëzimin penal nr.2893 për Veprën Penale të parashikuar nga neni 130/4 i Kodit Penal. Materiali është shortuar dhe i është ngarkuar prokurorit përkatës.  Ndërkohë, në lidhje me të dhënat e publikuara në media, ju bëjmë me dije se, nga ana e Prokurorisë kanë nisur verifikimet edhe në lidhje me publikimin e një videoje, provë materiale.

Nga verifikimet e para, ka rezultuar që materiali kallëzues është depozituar në Prokurorinë e Gjykatës së Shkallës së Parë të Juridiksionit të Përgjithshëm Tiranë, pasi videoja është publikuar në media të ndryshme dhe rezulton që zarfi ku është administruar prova të mos jetë i hapur. Në lidhje me rastin në fjalë, është ngarkuar Agjensia e Mbikëqyrjes Policore për të kryer veprimet hetimore përkatëse”, thuhet në Njoftim./tvklan.al