Përpos koreve raciste mbrëmjen e djeshme gjatë ndeshjes Çeki-Shqipëri tifozët vendas provokuan me përdhosjen e flamurit kuq e zi. Flamujve shqiptarë u janë vendosur shirita në formë kryqi dhe shqiponjën e kanë vendosur me kokë poshtë. Ndërkaq, tifozë të tjerë zgjodhën për të provokuar me territorin e Kosovës në një hartë ku dominant ishte flamuri serb dhe me thirrjet “Kosova është Serbi”.

Lidhur me këtë situatë ka reaguar edhe FSHF, e cila thekson se këto akte janë të patolerueshme dhe që nuk kanë lidhje me futbollin. Më tej, Federata shton se do i kërkojë UEFA-s të marrë masa të menjëhershme.

Në faqen zyrtare të FSHF shkruhet:  

Federata Shqiptare e Futbollit dënon me forcë aktet e turpshme që ndodhën gjatë ndeshjes së sotme kundër Çekisë. Koret raciste dhe përdhosja e flamurit shqiptar janë të patolerueshme dhe nuk i takojnë fushës së futbollit. Ky akt i rëndë përbën një sulm të hapur ndaj vlerave të futbollit dhe respektit midis kombeve.

Federata Shqiptare e Futbollit dënon fuqimisht çdo formë të racizmit dhe fyerjes ndaj simboleve kombëtare dhe do të dërgojë një notë proteste në UEFA, duke kërkuar masa të menjëhershme disiplinore. FSHF reagoi menjëherë që në pushimin e pjesës së parë duke u kërkuar organizatorëve marrjen e masave të menjëhershme ndaj këtyre akteve për të mos radikalizuar veprimet me ndërprerjen e lojës.

Futbolli është një lojë që bashkon dhe unifikon gjithë popujt duke promovuar barazinë dhe respektin për të gjithë, pavarësisht kombësisë apo përkatësisë etnike. Shqiptarët, si pjesë e familjes së madhe futbollistike, do të qëndrojnë gjithmonë në mbrojtje të këtyre vlerave dhe nuk do të tolerojnë asnjë formë racizmi apo urrejtjeje duke dënuar me forcë çdokënd që tenton të përdhosë bukurinë e këtij sporti.

Pavarësisht ndeshjes së sotme, Kombëtarja jonë ka treguar gjithmonë forcë dhe guxim për të përballuar çdo vështirësi duke u ngritur pikërisht atëherë kur lind nevoja. Bashkë me tifozët do të lëmë pas këtë ndeshje dhe bëhemi gati për të shkuar në Gjeorgji për një rezultat pozitiv.

/tvklan.al