#Lajme, #edicioniinformativ ora 19:30 data 17 Qershor 2023 #TvKlan #KlanLajme

Spiker: Redi Prifti

Headlines 17 Qershor 2023

Shpërthime në veri të Mitrovicës. KFOR: Siguria, përgjegjësi e policisë së Kosovës.

Nuk po gjen qetësi situata në veri të Kosovës ku gjatë natës së kaluar u dëgjuan shpërthime të fuqishme. Sot KFOR reagoi për sulmet ndaj gazetarëve, por shigjetoi policinë e Kosovës duke bërë atë përgjegjëse për ruajtjen e rendit dhe sigurisë. 

Begaj: Rajoni të reagojë kundër destabilizimit të Kosovës. Osmani: Koha të ulemi me SHBA e BE.

Presidenti i Republikës Bajram Begaj thotë se vendet e rajonit, anëtare në NATO, duhet të flasin me një zë për moslejimin e destabilizimit të Kosovës e gjithë rajonit. Ndërsa presidentja e Kosovës apelon se TANI është koha për t’u ulur me SHBA e BE.

Olsi Leku del për herë të parë para drejtësisë. I dënuar me burg bpërjetë për vrasje të dyfishtë .

Del për herë të parë para gjykatës pas ekstradimit nga Greqia, Olsi Leku i dënuar në mungesë me burg përjetë për një vrasje të dyfishtë në Elbasan në vitin 2012. 44-vjeçari është lënë në burg pa afat deri në shqyrtimin e çështjes së tij nga Apeli.

Të rinjtë nuk duan të punojnë? Raporti i INSTAT: 22.5% e tyre janë të papunë.

Bizneset ankohen për mungesën e fuqisë punëtore, por të rinjtë e papunë në Shqipëri po shtohen. Të dhënat më të fundit të INSTAT tregojnë se në 3 muajt e parë të vitit shkalla e papunësisë për moshën 15-29 vjeç është 22,5 %.

Moti i keq boshatis plazhet, anulohen prenotimet. Përmbytje në Serbi e Bosnje.

Moti i paqëndrueshëm, i ngjashëm me vjeshtën ka bërë që pushuesit të anulojnë prenotimet e fundjavës në plazhet shqiptare. Moti i keq ka përfshirë pothuajse të gjithë Ballkanin Perëndimor duke shkaktuar përmbytje në Serbi dhe Bosnje.

Shqipëri-Moldavi, sonte në Tv Klan. Sylvinho në dilemë për formacionin.

Luhet mbrëmjen e sotme sfida e Shqipërisë ndaj Moldavisë për kualifikueset e Euro 2024. Trajneri Silvinjo ka ende disa dilema për formacionin, por është i vendosur për një rreshtim sulmues. Sfida vjen ekskluzivisht në ekranin e Tv Klan.

/tvklan.al