Paris Hilton dhe Billy Crystal janë ndër të famshmit që kanë humbur shtëpitë e tyre në zjarret masive që kanë shpërthyer në Los Anxhelos.

Ndërkohë, aktori James Woods ka shpërthyer në lot teksa përshkruante për CNN humbjen e pronës së tij në Palisades.

“Një ditë je duke notuar në pishinë dhe të nesërmen ikën gjithçka”, tha ai.

Aktori Billy Crystal tha në një deklaratë se ai dhe gruaja e tij, Janice, ishin të trishtuar nga humbja e shtëpisë së tyre në Palisades ku ata kishin jetuar që nga viti 1979.

“Ne i rritëm fëmijët dhe nipërit tanë këtu. Çdo centimetër i shtëpisë sonë ishte i mbushur me dashuri, kujtime të bukura që nuk mund të harrohen. Ne jemi të thyer, por me dashurinë e fëmijëve dhe miqve tanë do ta kalojmë këtë”, u shpreh ai.

Gjithashtu, Paris Hilton tha se kishte humbur shtëpinë e saj në Malibu.

“Të ulesh me familjen time, të shikosh lajmet dhe të shohësh shtëpinë tonë në Malibu të djegur plotësisht në TV direkt është diçka që askush nuk duhet ta përjetojë kurrë. Kjo shtëpi është vendi ku kemi ndërtuar kaq shumë kujtime të çmuara… Zemra dhe lutjet e mia janë për çdo familje të prekur nga këto zjarre”, tha ajo në një postim në Instagram.

Miles Teller dhe gruaja e tij, Keleigh Sperry thuhet se humbën shtëpinë e tyre gjithashtu në Palisades. Duke postuar në Instagram, Sperry ndau një foto të zjarreve dhe një emoji me zemër të thyer.

Aktori Cameron Mathison ndau gjithashtu një video të shtëpisë së tij të kthyer në rrënoja të djegura.

“Ne jemi të sigurt. Por kjo është ajo që ka mbetur nga shtëpia jonë e bukur. Shtëpia jonë ku u rritën fëmijët tanë dhe ku ata donin të rrisnin të tyret një ditë”, shkroi ylli.

Këngëtarja legjendare Diane Warren humbi gjithashtu shtëpinë e saj. Ajo postoi një foto të plazhit pranë shtëpisë së saj, duke thënë se prona që ajo kishte për gati tre dekada ishte zhdukur.

Jennifer Aniston, Bradley Cooper, Tom Hanks, Reese Witherspoon, Adam Sandler dhe Michael Keaton gjithashtu raportohet se kanë shtëpi në Palisades të Paqësorit./tvklan.al