4 zyrtarë të Bashkisë së Devollit u pezulluan nga detyra me kërkesë të prokurorisë së Korçës, për akuzën e shpërdorimit të detyrës dhe falsifikim të dokumenteve. Në një njoftim për mediat, prokuroria thotë se ata kanë realizuar procedura fiktive për blerjen e mallrave të ndërtimit për Bashkinë Devoll, dhe nuk kanë kryer asnjë punim.

“Në kuadër të hetimeve të kallëzimit penal nr.577 të vitit 2023 rezultoi se personat në fjalë kanë kryer procedurën e prokurimit me objekt blerje mallra materiale ndërtimi për nevojat e Bashkisë. Por pasi është shpallur fituesi ndaj të kallëzuarve është ngritur akuza se kanë kryer në mënyrë fiktive si procedurën e marrjes në dorëzim dhe magazinimit të mallrave dhe pajisjeve, ashtu edhe daljen e tyre nga magazinimi dhe përdorimi për punime të ndryshme nga punonjësit e bashkisë. Kallëzuesi pretendon se nuk është blerë asnjë mall. Gjatë hetimeve të prokurorisë, nga administrimi i pamjeve filmike për periudhën e hetimit nuk shihen hyrje-dalje ngarkesa me materiale ndërtimi. Në vijim të konkluzioneve të nxjerra nga ekspertët, në rrugët rurale të fshatit nuk rezulton të ketë shtresa të reja çakulli apo të ndonjë ndërtimi”, thuhet në njoftimin e prokurorisë.

Nga hetimet e kryera, prokuroria arriti në konkluzionin se punonjësit e bashkisë së Devollit, “shtetasit: G.K. – Drejtor i Agjencisë së Shërbimeve Utilitare, Komunitare dhe Administrative; A.C. – Përgjegjës në Sektorin e Shërbimeve Publike; K.M. – Përgjegjës në Sektorin e Transportit në Agjencinë e Shërbimeve Publike; dhe E.M. – Magazinier në Sektorin e Menaxhimit financiar ”, kanë konsumuar veprat penale ‘Shpërdorim detyre’ dhe Falsifikimi i dokumenteve’.

Po sipas akuzës, “hetimi provoi se akti i marrjes në dorëzim të materialeve më 21.09.2022 nuk pasqyron dorëzimin faktik të të gjitha materialeve. Në këtë kuptim, sipas organit të akuzës personat duhet të mbajnë përgjegjësi penale për veprat e mësipërme. Në bazë të kërkesës së Prokurorisë, gjykata vendosi pezullimin nga detyra të punonjësve të bashkisë”./tvklan.al