Java nis nën ndikimin e temperaturave të ulëta dhe reshjeve. Meteorologu Hakil Osmani shprehet për Klan News se e hëna ka sjellë rënie të temperaturave dhe në disa zona malore, do të rishfaqen dhe reshjet e dëborës. E njëjta situatë do të vazhdojë edhe gjatë ditës së martë që do të shënojë sërish rënie të temperaturave me të paktën 3-4 gradë.

E mërkura përbën ndryshime pasi do të shënojë edhe vlera negative në zonat malore, por përgjatë ditës moti përmirësohet dhe termometri do të tregojë rritje të gradëve. Kjo situatë do të na shoqërojë deri ditën e premte pasi temperaturat maksimale do të jenë 18-19 gradë.

Sa u përket kushteve atmosferike, sot e nesër mbetemi në zotërimin e vranësirave të shpeshta të cilat  do të bëjnë që herë pas here në territorin shqiptar, në ultësirën perëndimore të kemi momente të pakta  me reshje shiu, reshjet do të jenë të karakterit lokal, ndërsa sa u përket zonave malore të thella, kryesisht  në verilindje, do të kemi rishfaqje të reshjeve të dëborës. Kjo vjen si pasojë e rënies së menjëhershme të temperaturave të ajrit që mëngjesin e sotëm kanë shënuar 4 gradë Celsius në qytetet e zonave malore, ndërsa sa u përket maksimumeve janë jo më shumë se 16 gradë në ultësirën perëndimore.

Dita e martë do të sjellë një rënie të temperaturave të ajrit, më e ndjeshme në orët e para të mëngjesit me të paktën 3-4 gradë Celsius duke bërë që vlerat minimale të regjistrohen në 0 apo 1 gradë Celsius në qytetet e zonave malore ndërsa maksimumet do të jenë jo më shumë se vlera 13 gradë Celsius të regjistruara në vijën bregdetare. Sa u përket qyteteve të zonës së ulët, përfshirë edhe kryeqytetin temperaturat do të jenë në 10-12 gradë Celsius.

Duke filluar nga orët e para të ditës së mërkurë kemi një tjetër rënie të temperaturave të ajrit duke bërë që minimumet të zbresin në vlera negative tashmë në qytetet e zonave malore duke bërë që të regjistrohen vlera në -2 apo -3 gradë Celsius në zona më të izoluara. Në orët e mesditës, do të ketë një  rritje të temperaturave të ajrit me të paktën 2 gradë Celsius duke bërë që maksimumet të jenë rreth vlerës 15 gradë Celsius por do të vijojë rritja e temperaturave të ajrit duke bërë që deri ditën e premte, vlerat minimale në qytetet e zonave malore të shkojnë në vlera pozitive në 1 apo 2 gradë Celsius, ndërsa sa u përket maksimumeve, do të kemi temperatura që do të ngjiten në 18-19 gradë Celsius”, tha Osmani.

Episodet me vranësira e kthjellime do të jenë të pranishme si edhe era do të ketë shpejtësi më të lartë në disa momente duke shkuar deri në 55 km/h./tvklan.al