Zbardhet ekspertiza e thikës së krimit në vrasjen e 14-vjeçarit pranë shkollës “Fan Noli” në Tiranë.

Burime për gazetarin e Klan News, Besar Bajraktaraj bëjnë me dije se janë gjetur në thikë 2 profile ADN-je, që i përkasin viktimës M.C. dhe shokut të tij, të plagosurit me iniciale L.M.

Nga ana e ekpertizës, ka rezultuar se mjeti prerës është përdorur vetëm nga autori i ngjarjes, 15-vjeçari me iniciale M.P.

Në ngjarjen e rëndë të ndodhur më 18 Nëntor të këtij viti ka mbetur viktimë 14-vjeçari M.C. pasi u godit me thikë në afërsi të shkollës “Fan Noli” nga bashkëmoshatari i tij.

Ndërkohë adoleshenti L.M., shok me viktimën, i cili ka mbetur i plagosur nga ngjarja është dërguar së fundmi për kurim në Itali. Gjendja e tij shëndetësore paraqitet jashtë rrezikut për jetën.

Ndërkohë, autori i dyshuar i ngjarjes M.P. është arrestuar një ditë pas krimit. Ndaj tij rëndojnë dy vepra penale: “Vrasja me dashje e kryer ndaj të miturit” dhe “Prodhimi, mbajtje pa leje e armëve të ftohta”./tvklan.al