Titujt kryesorë 22 Nëntor 2010, ora 19:30

Trafiku kolapson Tiranën, terrorizohen qytetarët

Tirana përjeton një kolaps të pashembullt të trafikut që ka nisur që përpara mesditës, duke bllokuar jetën normale në qytet. Rrugët kryesore dhe ato që shpërndahen në disa zona në kryeqytet janë bllokuara prej disa orësh, duke terrorizuar qytetarët.

Kokainë nga Panamaja, zbulohet një linjë e re e trafikut të droges

Autoritetet shqiptare kanë zbuluar një linjë të re të trafikut të drogës. Një pako me 1 kilogram kokainë e nisur nga Panamaja u zbulua nga policia, e cila vuri në pranga 3 persona. Në Tiranë sekuestrohen edhe 43 kilogramë kanabis sativa.

Vrasja tek “Jordan Misja”, policia: Autorët janë dy vëllezer

Policia identifikon autorët e vrasjes së ndodhur mëngjesin e djeshëm ne rrugen “Jordan Misja” në Tiranë dhe të zbardhë motivet e saj. Bëhet fjalë për dy vëllezer nga Durrësi, të shpallur në kërkim. Ndërsa vrasja ka ndodhur për hakmarrje.

Samiti i NATO–s, Berisha: Vizat, shqiptarët do të respektojnë kushtet

Kryeministri Berisha garantoi sot krerët e vendeve të Bashkimit Europian, pjesëmarrës në samitin e NATO–s se shqiptarët do të respektojnë të gjitha kushtet e liberalizimit të vizave. Ai kërkoi nisjen e zbukurimeve të bashkive, duke theksuar se shqiptarët kanë një motiv më tepër për të festuar.

Opozita: U rikthehemi protestave më 26 Nëntor

Por ndërsa shqiptarët presin të festojnë për liberalizimin e vizave, opozita paralajmëron nisjen e protestave. Spartak Ngjela njoftoi se protestat do të nisin ne Elbasan më 26 Nëntor.

Liberalizimi i vizave, ulet dogana për mallrat vetjake

Me liberalizimin e vizave qytetarët shqiptarë do të paguajnë më pak në doganë për mallrat e blera në Bashkimin Europian. Për çdo mall të deklaruar, pagesa do të ndryshoje nga 5 në 2 përqind.

“Kënget e Shekullit”, të tjera emocione e surpriza në natën e 6–të

Në natën e gjashtë, “Këngët e Shekullit” kanë ofruar të tjera emocione e surpriza, me interpretimet e hiteve të muzikës popullore e qytetare dhe me rikthimin në skenë të emrave të njohur që i kanë munguar ekranit për vite me radhë.

Edicioni i lajmeve Tv Klan  – 22 Nëntor 2010, ora 19:30 – Spikere: Fjoralba Mishaxhi