Fondi Monetar Ndërkombëtar është shprehur qartazi në mbështetje të kredisë prej 250 milionë eurosh që qeveria shqiptare arriti të sigurojë këtë javë nga disa banka ndërkombëtare.

Përfaqësuesja e FMN-së në Shqipëri, Ann-Margret Westin, tha për TV Klan se kjo hua përbën një sukses për ekonominë shqiptare.

Ann-Margret Westin: “Mendimi ynë është se në situatën e tanishme globale sidomos në vendet në zhvillim ka një klimë shumë të shtrënguar përsa i takon financimit, pra është e rëndësishme dhe ne e mirëpresim faktin që qeveria arriti të sigurojë këtë kredi. Ne përgëzojmë faktin që nëpërmjet kësaj kredie po hidhet më shumë valutë në ekonomi. Një problem i krizës aktuale është pikërisht mungesa e valutës, pra më pak flukse të kapitalit, rënie të të ardhurave nga emigrantët dhe investitorët në përgjithësi janë më nervozë, pra është shumë pozitive që ekonomia shqiptare ia arriti të sigurojë këtë kredi duke hedhur më shumë valutë në vend. Huaja do të ndikojë dhe në forcimin e monedhës vendase”.

Përfaqësuesja e Fondit Monetar duke folur rreth kushteve me të cilat është marrë kredia theksoi se më e rëndësishme në këtë pikë është që qeveria ia ka dalë për të bindur bankat ndërkombëtare për të financuar nevojat e buxhetit, por nga ana tjetër edhe kushtet e kontratës janë të favorshme për rifinancimin e tij.

Ann-Margret Westin: “Normat e interesit reflektojnë kushtet e tregut në këtë moment të vështirë. Një vit më parë qeveria arriti të marrë kredi me një tjetër normë interesi. Shpresa është që kushtet e tregut do të ndryshojnë, do të jetë më likuid dhe normat e interesit mund të ulen duke e rifinancuar borxhin. Këtu është pozitiv që sipas kontratës borxhi mund të paguhet para maturimit dhe pa penalitetet nëse kushtet e tregut do të përmirësohen. Gjithsesi në një klimë të tillë është vërtet një sukses për qeverinë sigurimi i një borxhi”./tvklan.al

Gazetar: Fjorald Zguro