Gjykata e Posaçme Kundër Korrupsionit dhe Krimit të Organizuar ka vendosur, me kërkesë të SPAK, sekuestro preventive për dy prona në pronësi të deputetes Monika Kryemadhi dhe mamasë së saj. Pasuritë e sekuestruara janë dy ndërtesa në rezidencën “Kodra e Diellit”.

“Pasuritë e sekuestruara janë: 1 ndërtesë në Selitë, Tiranë me sipërfaqe; kati përdhes, 152 m2, nga të cilat 82 m2 banesë dhe 70 m2 verandë; kati nëntokë 139 m2, kati i parë 79 m2, kati i dytë 51 m2, verandë, kati i dytë 27.9 m2 – në pronësi të shtetases Fatime Kryemadhi, me adresë Rezidenca “Kodra e Diellit”. 1 ndërtesë në Selitë, Tiranë me sipërfaqe; kati përdhes 152 m2, nga të cilat 82 m2 banesë dhe 70 m2 verandë, kati nëntokë 139 m2, kati i parë 79 m2, kati i dytë 51 m2, verandë kati i dytë 27.9 m2, në pronësi të Monika Kryemadhit, me adresë Rezidenca “Kodra e Diellit””, thotë SPAK.

Siç njofton SPAK, vendimi i Gjykatës së Posaçme u ekzekutua nga policia gjyqësore dje dhe sot (19 dhe 20 Nëntor 2024), duke vendosur bllokimin e pasurive në regjistrat e Agjencisë Shtetërore të Kadastrës, si dhe duke ua komunikuar këtë vendim pronarëve të pasurive.

Kujtojmë se një ditë më parë, Gjykata e Posaçme e Apelit la të pandryshuar masat e sigurisë ndaj Kryemadhit dhe ish-presidentit Ilir Meta. Pra deputetja do të hetohet nën masën detyrim paraqitje, ndërsa ish-bashkëshorti i saj, në arrest në burg. Të dy ata akuzohen nga SPAK për korrupsion, pastrim parash dhe mosdeklarim të pasurisë./tvklan.al