Policia: Dyshohet se përplasi me dashje biçikletën me të cilën lëvizte ish-vjehrri i tij

48-vjeçari me iniciale E.Ç. ka rënë në prangat e policisë pasi ka tentuar që të vrasë ish-vjehrrin e tij 68-vjeçar.

Uniformat blu njoftojnë se i arrestuari me makinën që drejtonte ka përplasur me dashje biçikletën me të cilën lëvizte në korsinë e dedikuar për këto mjete, ish-vjehrrin e tij me iniciale A.U. ditën e djeshme (02.03.2024) në Shkodër.

I aksidentuari paraqitet jashtë rrezikut për jetën. Ngjarja dyshohet se ka ndodhur për motive të dobëta. Automjeti që drejtonte 48-vjeçari është sekuestruar në cilësinë e provës materiale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

Njoftimi i policisë:

Shërbimet e Komisariatit të Policisë Shkodër, menjëherë pas marrjes së njoftimit se një shtetas kishte përplasur me automjetin që drejtonte, biçikletën me të cilën lëvizte një 68-vjeçar, në korsinë e dedikuar, kanë nisur menjëherë veprimet hetimore për zbardhjen e rrethanave të rastit, identifikimin dhe kapjen e drejtuesit të automjetit.

Në përfundim të veprimeve, specialistët për Hetimin e Krimeve të Komisariatit të Policisë Shkodër arrestuan në flagrancë shtetasin:

E. Ç., 48 vjeç, banues në Shkodër, për veprën penale “Vrasja me paramendim”, mbetur në tentativë.

Ky shtetas, më datë 02.03.2024, në rrugën “Marin Biçikemi”, dyshohet se për motive të dobëta, me automjetin që drejtonte, ka përplasur me dashje biçikletën me të cilën po lëvizte në korsinë e dedikuar për biçikleta, ish-vjehrri i tij, shtetasi A. U., i cili është jashtë rrezikut për jetën.

Automjeti që drejtonte shtetasi E. Ç. është sekuestruar në cilësinë e provës materiale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

/tvklan.al