Një konflikt mes nxënësve të shkollës së mesme së Cakranit ka degraduar deri në përdorimin e thikës. Policia njofton se 17-vjeçari me iniciale B.D. ka goditur me thikë bashkëmoshatarin e tij, Y.Xh. (të dy nxënës të kësaj shkolle).

I plagosuri u transportua në spitalin Rajonal Fier për ndihmë mjekësore dhe ndodhet jashtë rrezikut për jetën. Ngjarja ka ndodhur rreth orës 08:30 në ambientet e shkollës së mesme së Cakranit në Fier.

Burime për korrespondenten e Klan News, Anila Sefa bëjnë të ditur se autori ka deklaruar se me bashkëmoshatarin e tij janë konfliktuar sapo kanë hyrë në oborrin e shkollës pasi kishin debatuar mbrëmjen e djeshme për një postim në rrjetin social “Snapchat”.

Ndërkohë, shërbimet e Policisë kanë kapur dhe shoqëruar në Komisariat për veprime të mëtejshme autorin e dyshuar, si dhe kanë sekuestruar në cilësinë e provës materiale thikën. Grupi hetimor po punon për sqarimin e plotë të rrethanave të rastit./tvklan.al