Gjykata e Lartë ka rrëzuar kërkesën e bërë nga Fredi Beleri për të pezulluar vendimin e gjykatës që e dënoi atë me 2 vite burg.

Treshja e gjyqtarëve vendosën të mos e pranojnë kërkesën e tij si të pabazuar dhe pa shkaqe të ligjshme.

“Gjykata e Lartë vendosi mospranimin e kërkesës së kërkuesit Dhionisios Alfred Beleri, për pezullimin e ekzekutimit të vendimit nr. 14 datë 05.03.2024 të Gjykatës së Posame të Shkallës së Parë për Korrupsionin dhe Krimin e Organizuar, i lënë në fuqi me vendimin nr.26, datë 25.06.2024 të Gjykatës së Posaçme e Apelit për Korrupsionin dhe Krimin e Organizuar”, njoftoi Gjykata e Lartë.

Më 25 Qershor, Gjykata e Posaçme e Apelit la në fuqi vendimin e Shkallës së Parë dhe e dënoi Fredi Belerin me 2 vite burg për blerjen e votave në Himarë. Ai u vu në pranga më 12 Maj të vitit 2023 dy ditë para zgjedhjeve lokale.

Pavarësisht se arriti të sigurojë votat për t’u zgjedhur në krye të Bashkisë së Himarës ai nuk e bëri dot betimin si i tillë. Pas vendimit të Apelit, KQZ ia hoqi përfundimisht mandatin si kryebashkiak.

“Jemi në kushtet e humbjes së mandatit të kryetarit të Bashkisë Himarë, dhe shpallim të pavlefshëm këtë mandat”, tha Komisioneri Shtetëror i Zgjedhjeve, Ilirjan Celibashi.

Megjithatë pavarësisht se ndodhet në burg, Beleri u zgjodh si përfaqësues i Greqisë në Parlamentin Europian pasi ishte në listat e partisë qeverisëse “Demokracia e Re” në zgjedhjet që u zhvilluan në Qershor./tvklan.al