Një mundësi më shumë për të kontribuar për politikën pa qenë anëtarë të saj. Këtë ofron së fundmi kreu i Partisë Socialiste nëpërmjet “Dialogut më shoqërinë” në ndalesën e radhës Shkodër. Rama nga ky qytet shpjegoi arsyet e krijimit të bordit të “Dialogut me shoqërinë”.

Edi Rama: “Ky bord duhet menduar si një urë mes partisë dhe shoqërisë, mes politikës dhe njerëzve. Për të bërë të mundur që sa më shumë njerëz t’i afrohen politikës, jo për t’u bërë politikanë domosdoshmërish, po për t’iu shpjeguar të gjithëve se duhet të mbajmë pozicione të caktuara kur jeta jonë e përbashkët ka të bëjë me zgjedhje të caktuara që na interesojnë të gjithëve.”

Kreu socialist theksoi se ndryshimi i cilësisë së politikës në vend mund të vijë nëpërmjet hapjes së PS drejt një grupi më të madh shoqëror i cili do të ketë kontributin e tij edhe në vendimmarrje.

Edi Rama: “Kjo është plotësisht e mundur dhe atëherë me siguri cilësia e politikëbërjes do të ndryshojë, cilësia e vendimmarrjes do të ndryshojë dhe pa diskutim ekzekutimi i vendimeve politike do të ndryshojë./tvklan.al

Gazetar: Drini Zeqo