Euro 2024 Prokuroria e Posaçme Kundër Korrupsionit dhe Krimit të Organizuar ka kryer operacion në disa qytete të vendit pasi janë firmosur mbi 30 urdhërarreste pas deklarimeve të të penduarve të drejtësisë, si dhe bazuar në komunikimet në Sky Ecc.
Gazetarja e Klan News, Glidona Daci raporton se operacioni është vazhdim i “Plumbit të artë”, pasi janë zbardhur disa vrasje të ndodhura në disa qytete të vendit, përfshirë edhe Elbasanin. Sipas asaj që raporton gazetarja e Klan News, Glidona Daci, janë zbardhur 6 ngjarje kriminale.
Një nga ngjarjet që zbardhur nga SPAK është ajo që njihet si masakra e Bradasheshit e Dhjetorit 2018, ku u ekzekutua Endrit Alibeaj, Alben Dylgjeri dhe një shtetas rumun me pasaportë turke, mik i familjes. (Lexo më shumë)
Është zbardhur dhe vrasja e Klevis Kapllanit, i cili u ekzekutua me 14 plumba në Shtator të 2020-ës. Klevis Kapllani, dyshohet se u nxorr në pritë për shkak të ngjarjeve kriminale në Elbasan. (Lexo më shumë).
Në kuadër të operacionit është zbardhur dhe atentati ndaj vëllezërve Baho, ku njëri prej tyre mbeti viktimë (Klevi Baho) dhe tjetri i plagosur (Sandër Baho). Klevi Baho, mbeti i i vrarë në atentat në Korrik 2019 në Elbasan. (Lexo më shumë)
Nga operacioni është zbardhur edhe vrasja e Andi Zylyfit dhe plagosja e mikut të tij, Ardit Uruçi, e ndodhur në Dhjetor 2019 në Peqin. Zylyfi dhe Uruçi u qëlluan me breshëri automatiku sapo dolën nga një lokal dhe hipën në makinën e tyre. Pista kryesore e hetimit ishte ajo e hakmarrjes për shkak të lidhjeve familjare që viktima 26-vjeçari, Zylyfi kishte me Endrit Alibeaj, i cili u ekzekutua në rrethrrotullimin e Bradasheshit bashkë me dy persona të tjerë. (Lexo më shumë)
SPAK ka zbardhur dhe atentatin e mbetur në tentativë ndaj biznesmenit Irfan Hazizi në Nëntor të vitit 2020 në Berat para një karburanti. Ngjarja ndaj biznesmenit ka dyshime të ketë lidhje me vrasjen e Bujar Çelës, vëllait të të shumëkërkuarit Talo Çela. (Lexo më shumë)
Ndërkohë mes personave që janë firmosur urdhërarreste, ka edhe efektivë të policisë dhe ish-zyrtarë të drejtësisë. Sipas të njëjtave burime, masë sigurie “arrest shtëpie” është caktuar edhe ndaj ish-gjyqtares së Elbasanit, Pajtime Fetahu.
Gazetarja Daci ka mësuar se Pajtime Fetahu rezulton të jetë personi, e cila ka falsifikuar një dokument dhe një vendim gjyqësor.
Në kuadër të operacionit të SPAK, për lidhje me grupet kriminale në Elbasan është arrestuar edhe zv.drejtori i burgut, Bradashesh, Martin Musaj. Pasi ka rënë në pranga, Musaj është shkarkuar nga detyra e zv.drejtorit të burgut.
Akoma nuk ka njoftim zyrtar nga SPAK lidhur me operacionin, ndërsa informacione më shumë priten në vijim.
EMRAT E PERSONAVE NDAJ TË CILËVE ËSHTË CAKTUAR URDHËRARREST:
- Talo Çela
- Altin Kamami
- Rexhino Doci
- Arben Lamcja
- Arsen Mema
- Eljo Bitri
- Leam Rragami
- Elvis Daka alias Dragoviç
- Dorjan Dyli
- Matilda Hoxholli
- Denada Todi
- Flobenc Mecja
- Armis Stafa
- Maksim Koci
- Erzen Çopja
- Franc Çopja
- Hajdar Bako alias Çopja
- Mikael Qosja
- Maetin Musaj
- Guri Biba
- Pajtime Fetahu
- Renato Masuku
- Leonardo Rragami,
- Altin Ndoci
- Agustin Cinari
- Xhimi Hoxha
- Klodian Sinameta
ATENTATI NDAJ IRFAN HAZIZIT – NËNTOR 2020
Në Berat në Nëntor të 2020-ës u bë atentat i mbetur në tentativë ndaj biznesmenit, Irfan Azizi. Kjo ngjarje ndodhi përpara një karburanti, pronë e biznesmenit. Ka dyshime se krimi është kryer në kuadër të grupit të strukturuar kriminal.
Ngjarja ndaj bizmensmenit dyshohet të ketë lidhje me vrasjen e Bujar Çelës, vëllait të të shumëkërkuarit Talo Çela.
VRASJA E ELVIS KAPLLANIT – SHTATOR 2020
I ekzekutuar me 14 plumba në Shtator të 2020-ës, Klevis Kapllani, dyshohet se u nxorr në pritë për shkak të ngjarjeve kriminale në Elbasan.
Klevis Kapllani doli për të konsumuar një kafe mbrëmjen e së hënës dhe i tha familjes që nuk do vonohej shumë. Dyshohet se ai është telefonuar nga të njohur të tij, të cilët më pas kanë bashkëpunuar për ekzekutimin me një kallashnikov me silenciator.
Para vrasjes së Kapllanit, në Elbasan u vranë Emiljano Ramazani dhe Denis Runaj. Gjithashtu Klevis Kapllani ka qenë i dënuar për trafik droge në Itali, dhe hetimet kanë vijuar edhe në këtë pistë. Asokohe, familja e tij shprehej se nuk kishin dijeni për konflikte.
VRASJA E ANDI ZYLYFIT – DHJETOR 2019
Në Dhjetor 2019 në Peqin, mbeti i vrarë Andi Zylyfi 26 vjeç dhe u plagos shoku i tij Ardit Uruçi 23 vjeç. Viktima dhe miku i tij u qëlluan me breshëri automatiku sapo kanë dalë nga një lokal dhe kanë hipur në makinën e tyre.
Hetuesit kanë parë pamjet e kamerave të sigurisë së disa bizneseve, të cilat kanë filmuar momentin kur atentatorët i janë afruar makinës së viktimës dhe kanë qëlluar me kallashnikov. Më pas, ata janë larguar me shpejtësi me një makinë në drejtim të Rrogozhinës, ku edhe kanë humbur gjurmët.
Atentatorët kanë qenë të pamaskuar, por mbanin kapele. Policia gjeti në vendin e ngjarjes 14 gëzhoja kallashnikovi. Hetuesit thonin se viktima ishte mbajtur nën vëzhgim nga personat që kanë organizuar atentatin, çka ngre dyshime se dy vrasësit kanë pasur bashkëpunëtorë të tjerë që kanë parë lëvizjet e Zylyfit dhe mikut të tij.
Pista kryesore e hetimit është ajo e hakmarrjes për shkak të lidhjeve familjare që viktima 26-vjeçar Zylyfi kishte me Endrit Alibeaj, i cili u ekzekutua në rrethrrotullimin e Bradasheshit bashkë me dy shtetas të tjerë.
ATENTAT VËLLEZËRVE BAHO – KORRIK 2019
24-vjeçari Klevi Baho, mbeti i i vrarë në një atentat të tipit mafioz në Korrik 2019 në Elbasan. Ai po kthehej bashkë me të vëllain në shtëpi kur makina me të cilën udhëtonin u qëllua me breshëri automatiku pranë fshatit Broshkë në rrugën Elbasan-Peqin.
Autorët që mendohet se kanë qenë dy persona, u kishin zënë pritë dy vëllezërve duke hapur zjarr nga një tjetër automjet. Nga të shtënat, i plagosur mbeti vëllai i viktimës, 29-vjeçari Sandër Baho.
Ky i fundit mori tre plumba në shpatull, por pas ndihmës së parë është jashtë rrezikut për jetën. Në vendngjarje u gjetën 35 gëzhoja kallashnikovi me të cilën autorët qëlluan ndaj dy vëllezërve. Policia dyshon se shkak i atentatit të ketë qenë larja e hesapeve.
MASAKRA E BRADASHESHIT – DHJETOR 2018
Tre persona mbetën të vrarë në një atentat të përgjakshëm në Dhjetor 2018 në Elbasan. Ngjarja ndodhi në zonën e Bradasheshit pranë Metalurgjikut, ku persona të paidentifikuar kanë hapur zjarr në drejtim të një automjeti ku ndodheshin viktimat.
Nga breshëritë e plumbave humbi jetën Indrit Alibej 34-vjeç dhe Arben Dylgjeri 25-vjeç, si dhe një shtetas rumun me pasaportë turke, me iniciale E.K. Shqiptarët e vrarë janë të afërm me njëri-tjetrin, xhaxha dhe nip. Edhe shtetasi rumun besohet se është i afërm i bashkëshortes së Alibejt, për të cilin thuhej se ishte i martuar me një rumune dhe jeton me të në Holandë.
Objektiv i atentatit dyshohet se ka qenë pikërisht Alibej. Pista kryesore e hetimit është ajo e prishjes së pazareve të drogës, pasi Indrit Alibej figuron me precedentë të mëparshëm penalë. Ai ka qenë i arrestuar për trafik droge në Itali në 2013-ën.
Viktimat kanë qenë duke darkuar në një nga restorantet e zonës dhe u është ngritur pritë sapo kanë hipur në një makinë me targa italiane. Automjeti ku ishin viktimat humbi kontrollin pasi u qëllua dhe doli nga rruga. Policia thotë se autorët kanë qenë disa dhe janë larguar me një makinë në drejtim të Peqinit.
/tvklan.al
