Ministria e Arsimit ka reaguar për ngjarjen e rëndë ku për pasojë humbi jetën nxënësi i shkollën “Fan Noli” në Tiranë. Teksa shpreh ngushëllimet për familjen e nxënësit që humbi jetën, Ministria kërkon nga institucionet ligjzbatuese që të kryejnë zbardhjen e menjëhershme të të gjitha rrethanave të ngjarjes.

Më tej, në reagimin zyrtar thuhet se siguria në shkolla dhe jashtë tyre ka qenë dhe do të mbetet një prioritet absolut, i bashkëpunimit mes Ministrisë së Brendshme, Policisë së Shtetit, Ministrisë së Arsimit, Pushteti Vendor, komunitetit dhe të gjithë shoqërisë.

Sjellim në vëmendje se një konflikt mes disa adoleshentëve ditën e sotme, ka përfunduar në mënyrë tragjike për një 14 vjeçar. Si pasojë e një goditje me thikë, ai nuk ka mundur t’i mbijetojë plagëve.

Mësohet të kenë mbetur të plagosur edhe dy persona të tjerë, njëri prej të cilëve i transportuar tek Spitali i Trumës dhe një tjetër, i dyshuar si një nga autorët, është transportuar në një spital privat.

Reagimi i plotë i Ministrisë së Arsimit dhe Sportit:

Jemi thellësisht të tronditur nga ngjarja tragjike e ndodhur sot në rrugën “Qemal Stafa”, Tiranë, ku një konflikt mes tre të miturve çoi në humbjen e jetës së njërit prej tyre, nxënës i shkollës “Fan Noli”.

Ngushëllimet tona më të sinqerta i shkojnë familjes së nxënësit që humbi jetën, ndërsa urojmë shërim të shpejtë për nxënësin tjetër. Në të njëjtën kohë, kërkojmë nga institucionet ligjzbatuese që të kryejnë zbardhjen e menjëhershme të të gjitha rrethanave të kësaj ngjarjeje.

Siguria në shkolla dhe jashtë tyre ka qenë dhe do të mbetet një prioritet absolut, i bashkëpunimit mes Ministrisë së Brendshme, Policisë së Shtetit, Ministrisë së Arsimit, Pushteti Vendor, komunitetit dhe të gjithë shoqërisë.

Ministria e Arsimit dhe Sportit ka marrë në vazhdimësi, dhe është duke zbatuar masa konkrete për të garantuar që procesi i mësimdhënies, në të gjitha shkollat e Shqipërisë, të kryhet në mënyrë sa më të sigurt, të rregullt e me standarte.

Ndërkohë që Ministria e Arsimit dhe Sportit është maksimalisht e angazhuar për të siguruar mjedise sa më të sigurta për zhvillimin normal të mësimit në të gjithë Shqipërinë, mbetet gjithmonë thelbësor roli sa më aktiv i të gjitha palëve, prindër, mësues, punonjës të policisë së shtetit, institucione arsimore por edhe komuniteti, për të bërë të mundur parandalimin e ngjarjeve të tilla në të ardhmen.

/tvklan.al