Babai i J. Zh., M. Zh., ka folur këtë të hënë në një intervistë për emisionin “Opinion”, në Tv Klan.

Rikujtojmë se J.Zh., u raportua se kishte “ngujuar” nënën, gruan dhe fëmijët e tij të mitur brenda shtëpisë. Ai madje kishte vendosur edhe kamera për t’i monitoruar gjatë gjithë kohës nëse dalin jashtë.

M. Zh., u shpreh gjatë intervistës, se kamerat u vendosën në mirëkuptim me familjen dhe me gruan.

M. Zh: E kanë bërë bashkëbisedë, për ta siguruar shtëpinë se ne ikim andej. Vendosim disa kamera, se po na hapin derën e po na bëjnë ndonjë gjë, për siguri. Edhe vendosëm bashkërisht.

Gazetarja: Pra, ju po thoni që ka qenë edhe bashkëshortja dakord për vendosjen e kamerave?

M. Zh: Shumë dakord ka qenë.

Gazetarja: Po si është e mundur që në polici bashkëshortja, kur është pyetur, ka thënë që “unë kam qenë e izoluar” dhe ka pasur dhe dy letra që ka tentuar të vrasë veten. Si është puna e letrave?

M. Zh: Për letrat e kam pyetur unë, unë nuk di asgjë fare për letrat, por ajo ka qenë e rënduar psikologjikisht. E donte shumë. Edhe ai ishte i ngarkuar psikologjikisht.

Babai i J. Zh., gjithashtu tregoi se djali kishte nevojë për një vizitë tek psikiatri, por nuk morën asnjë mjek, pasi nuk donin ta përkeqësonin gjendjen e tij apo ta acaronin më tepër.

Gazetarja: Ju mendoni që ai kishte nevojë për një vizitë psikiatrike?

M. Zh:Unë mendoj që ai kishte nevojë. Të tre ne e mendojmë këtë punë, bashkë edhe me prindërit e asaj, e nuses.

Gazetarja: I kishit konsultuar me krushqit?

M. Zh: Ishim konsultuar.

Gazetarja: Po pse nuk morët asnjë hap për shembull, nuk ju shkoi në mendje që mund të merrnit një mjek, të merrnit policinë, të merrnit ambulancën?

M. Zh: Po s’e bënim dot atë se thamë ne mos ta acaronim më shumë, e bëjmë më keq. Kështu mendojmë ne tani, se nuk e dimë gjë ne. Ka qenë problem i një viti, një vit e gjysmë se ky ka ardhur duke u rënduar.

Gazetarja: Ka ardhur duke u rënduar në këtë një vit?

M. Zh: Po, ka ardhur duke u rënduar. Realisht duke u rënduar, por gjithmonë ne ecnim me atë mendimin që ky do të reflektojë.

Gazetarja: Vajza ka shkuar çdo ditë në shkollë?

M. Zh: Çdo ditë, përveç të premtes.

Gazetarja: Po sot kush e çoi vajzën në shkollë?

M. Zh: Po këtë pra po them unë…

Gazetarja: Nusja e ka çuar vetë?

M. Zh: Nusja vetë me makinë, gruaja ime me të.

Gazetarja: Nusja është në shtëpinë tuaj apo është në Roskovec tek prindërit e vet?

M. Zh: Këtu tek shtëpia ime. Shko e shihe, ose si të duash. Është gruaja ime, bashkëshortja e djalit edhe dy fëmijët, i ke aty.

Gazetarja: A kishte skena xhelozie me gruan?

M. Zh: Absolutisht jo. /tvklan.al