Ministria e Mbrojtjes ka bërë një panoramë të situatës së vendit tonë si pasojë e motit të keq.

Reshjet e shiut, që në disa zona të vendit kanë qenë me intensitet të lartë kanë shkaktuar bllokim të disa akseve rrugore, veçanërisht në qarkun e Shkodrës.

Por, përgjithësisht, situata është pa problematika serioze sa i përket infrastrukturës kombëtare.

“Në aksin Prekal – Kir, strukturat po punojnë për hapjen e rrugës. Rruga Mes-Dukagjin është bllokuar për shkak të rrëshqitjes së gurëve. Edhe këtu po punohet për pastrimin e saj”, njoftoi Ministria e Mbrojtjes.

Si pasojë e motit të keq, disa zona janë pa energji për shkak të defekteve në rrjet.

Rajone të ndryshme, përfshirë Tiranën, Durrësin, Elbasanin, Berat, Vlorën, Korçën, Gjirokastrën, Kukësin, Shkodrën dhe Burrelin, po përballen me ndërprerje të energjisë elektrike në zona të caktuara.

“Punonjësit e OSSH janë në terren dhe po punojnë për riparimin e defekteve dhe rikthimin e furnizimit me energji në këto zona. Situata po ndiqet me vëmendje nga strukturat e Mbrojtjes Civile në nivel vendor dhe qendror. AKMC është në kontakt me të gjitha prefekturat dhe bashkitë, për të koordinuar punën në çdo rast nevoje”, njoftoi Ministria e Mbrojtjes./tvklan.al