Lufta kundër drogës është një sfidë globale. Kështu e ka cilësuar ministri i Brendshëm Taulant Balla rrezikun që vjen së fundmi nga përdorimi i lëndëve sintetike, të cilat po marrin jetën e të rinjve përdorues.

“Shembulli më kuptimplotë i kësaj që solli Sekretari Blinken për SHBA, ku fentanoli është vrasësi kryesor i jetëve në moshën 18-45 vjeç në SHBA. Po ashtu, nuk janë vetëm SHBA. Tashmë fentanoli është prezent edhe në Europë, dhe ku duhet të bashkëveprojmë të gjithë për të krijuar një strategji për të parandaluar të gjitha rreziqet që vijnë nga përdorimi i kësaj droge”.

Ministri Balla tha se vendi ynë duhet të shtojë masat në koordinim me vendet e Rajoni dhe BE për të parandaluar hyrjen dhe përdorimin nga të rinjtë.

“Na duhet që edhe ne të përgatitemi në kohë, duke ngritur një sistem dhe po ashtu një Observator të lëndëve narkotike, në mënyrë që të parandalojmë, qoftë hyrjen dhe, mbi të gjitha, përdorimin e këtyre lëndëve narkotike nga të rinjtë e kushdo tjetër, edhe në Shqipëri. Prandaj Paketa e Sigurisë në Shkolla e ka pasur dhe do të vazhdojë ta ketë në fokusin e vet luftën kundër çdo lloj forme të lëndëve narkotike”.

Deklarata e ministrit Balla vjen pas takimit të Nivelit të Lartë të Komisionit të Drogave dhe Krimit UNODC në Vjenë, ku Shqipëria bëhet anëtare e Koalicionit Global për adresimin e Rrezikut të Drogave Sintetike.

Tv Klan