Trajneri i Real Madrid, Carlo Ancelotti, pret një ndeshje shumë të luftuar ndaj Liverpool në Champions League.

Në konferencën para ndeshjes, tekniku madrilen deklaroi se përballen dy klube historike dhe do të jetë një ndeshje spektakolare.

Ancelotti ndër të tjera tha se skuadrës së tij i duhen pikët dhe synim është fitorja.

“Do jetë një ndeshje shumë e luftuar. Jemi dy klube historike. Secila skuadër ka karakteristikat e veta dhe të shikojmë çfarë do të ndodhë. Liverpuli ka qenë gjithmonë konkurrues. Ashtu ishte me Klopin, po ashtu është edhe me trajnerin e ri.

Ekipi po ecën mirë. Jemi përmirësuar, jemi më solidë. Tani kemi një ekip shumë kërkues përpara. Jam i bindur se do të jetë një lojë e shkëlqyer. Ne do të jemi konkurrues. Çdo fitore të jep më shumë besim. Liverpuli po bën shumë mirë në këtë kompeticion, por ne jemi kthyer në formë dhe shpresojmë të bëjmë mirë. Fundi i sezonit është shumë larg.

Mendoj se duhet të presim për të folur më pas për formatin e Ligës së Kampioneve, është pak më ndryshe nga e kaluara. Ajo që mund të them tani, është se ndaj Liverpulit do të jetë një ndeshje e shkëlqyer. Është e rëndësishme. Duhet të marrim pikë. Në ndeshjet që vijnë deri në fund duhet të marrim sa më shumë pikë. Nuk e di nëse mund të arrijmë në tetë të parët, sepse tashmë kemi humbur dy ndeshje, por duhet të marrim sa më shumë pikë”, deklaroi Ancelotti.

Ndeshja Liverpool-Real Madrid do të luhet të mërkurën në orën 21:00. /tvklan.al