Rebelët sirianë pretendojnë se kanë marrë nën kontroll kryeqytetin, Damaskun, pas një ofensive që nisi ditët e fundit.

Ata njoftuan në televizionin shtetëror të dielën se kanë rrëzuar presidentin Bashar al-Assad, duke eliminuar një dinasti familjare 50-vjeçare në një ofensivë të rrufeshme që ka ngjallur frikën për një valë të re destabiliteti në një Lindje të Mesme të kapluar nga lufta.

Forcat rebele në Damask e shpallën kryeqytetin “të lirë”, ndërsa forcat qeveritare u tërhoqën. Mijëra njerëz me makina u mblodhën në një shesh kryesor në Damask duke tundur flamuj dhe brohoritur “Liri”.

“Ne festojmë me popullin sirian lajmin e lirimit të të burgosurve tanë dhe fundin e epokës së padrejtësisë,” thanë rebelët, duke iu referuar një burgu të madh ushtarak në periferi të Damaskut, ku qeveria siriane arrestoi mijëra njerëz.

Komanda e ushtrisë siriane njoftoi oficerët të dielën se regjimi i Asadit kishte përfunduar. Por ushtria siriane më vonë tha se po vazhdonte operacionet kundër “grupeve terroriste” në qytetet kyçe të Hamës dhe Homsit dhe në fshatin Deraa.

Assad, i cili kishte shtypur të gjitha format e mospajtimit, fluturoi nga Damasku për në një destinacion të panjohur. Dy burime siriane thanë se ekzistonte një probabilitet shumë i lartë që Assad mund të ishte vrarë pas përplasjes së avionit pasi mbetet mister pse avioni mori një kthesë të papritur dhe u zhduk nga harta sipas të dhënave nga faqja e internetit Flightradar.

Kapja e qytetit Homs është gjithashtu një simbol i fuqishëm i rikthimit dramatik të lëvizjes rebele. Një pjesë e Homsit u shkatërruan nga një rrethim midis rebelëve dhe ushtrisë vite më parë. Rënia e Homsit u dha kryengritësve kontrollin mbi qendrën strategjike të Sirisë duke shkëputur Damaskun nga rajoni bregdetar.

Ndërsa sirianët shprehnin gëzimin, kryeministri Mohammad Ghazi al-Jalali tha se ai ishte i gatshëm të mbështeste vazhdimësinë e qeverisjes dhe i gatshëm të bashkëpunonte me çdo lidership të zgjedhur nga populli sirian. Shtëpia e Bardhë tha se Presidenti amerikan Joe Biden dhe ekipi i tij po monitorojnë “ngjarjet e jashtëzakonshme në Siri” dhe ishin në kontakt me partnerët rajonalë. 

Rrëzimi i Bashar al-Assad  shënon gjithashtu një moment sizmik për Lindjen e Mesme, duke i dhënë një goditje masive Rusisë dhe Iranit, të cilat kanë humbur një aleat kyç në zemër të rajonit dhe duke krijuar më shumë pasiguri. Ritmi i ngjarjeve ka habitur kryeqytetet arabe dhe ka ngritur frikën për një valë të re të paqëndrueshmërisë rajonale.

Tv Klan