Pas protestave të shumta të qytetarëve, qeveria vendosi të krijojë Bordin Kombëtar për Administrimin e Karburantit, në mënyrë që të kishte monitorim mbi çmimin e naftës dhe të nënprodukteve të saj.

Në mbledhjen e fundit, Bordi vendosi se çmimi i naftës do të jetë 203 lekë, për periudhën 16-21 Mars.

Mininstrja e Infrastrukturës dhe Energjisë, Belinda Balluku tha në emisionin “Opinion” në “Tv Klan”, se Bordi ishte instrumenti me të cilin qeveria mund t’i vendoste një tavan marzhit të fitimit, për subjektet e këtij sektori.

Madje, sipas Ballukut, tregtarët e karburanteve sot nuk kanë fitim.

“A ka abuzim me naftën? Instrumenti që ne sot përdorim me Bordin, është vendosja e tavanit për marzhin e fitimit. Ne i kemi vënë një tavan marzh të fitimit, të cilin për më tepër e kemi marrë bruto. Kur marzhin e fitimit e merr bruto, detyrimisht aty brenda janë kostot operative. Në një moment në treg, kur fillon dhe shikon që po rritet produkti që ti tregton, ka edhe një pasiguri që i krijohet tregtarit, dhe ai aplikon marzhe më të larta fitimi, që të mbrohet në momentin e ekspozimit. Sot që flasim, ata nuk fitojnë për momentin. Po mundohemi të parashikojmë edhe për të ardhmen. Pritet që të vijnë sasi të tjera nafte, me koston e bursës”, tha Balluku./tvklan.al