Qeveria do ta bëjë të ditur në datën 1 Dhjetor masën e uljes së çmimit të energjisë elektrike. Zv/kryeministrja Belinda Balluku gjatë replikave me deputetë të opozitës në parlament, pohoi se vendimi do të komunikohet në fillim të muajit tjetër, por pa dhënë shifra konkrete.

“E kemi bërë analizën, nuk thamë do ta shohim, thamë po punojmë për të bërë analizën dhe në 1 Dhjetor do të kemi informacionin e plotë për sa i përket rishikimit dhe uljes së çmimit sipas kritereve të Bashkimit Europian. Unë e di që këto lajme ju shqetësojnë”.

Po në përgjigje të akuzave të deputetëve demokratë, Balluku shpjegoi edhe njëherë përse çmimi i energjisë për furrat e bukës është me tre nivele.

“Vetëm ato furra të cilat prodhojnë vetëm bukë, marrin çmimin preferencial prej 7.6 lekësh për kWh, ato që kanë dhe shërbimin e pastiçerisë 9.5 dhe ato që kanë dhe bar kafe 12.”

Aktualisht për konsumatorët familjarë, çmimi i energjisë për kilovator është 9.5 lekë pa TVSH. Vendimi që qeveria do marrë muaj e ardhshëm për uljen e çmimit të energjisë pritet të hyje në fuqi nga 1 Janari.

Tv Klan