Një ditë pasi kuvendi miratoi me 106 vota “pro” ndryshimet në kodin zgjedhor, Kreu i Partisë Demokratike Sali Berisha ka hedhur poshtë akuzat se pas votës së demokratëve fshihet një marrëveshje me maxhorancën.

“Nuk ekziston absolutisht asnjë marreveshje lidhur me reformën zgjedhore. Ndryshimet e votuara në Parlament në Kodin Zgjedhor nuk kanë absolutisht asnjë lidhje me reformën zgjedhore të rekomanduar nga OSBE-ODHIR për zgjedhje të drejta dhe të ndershme në Shqipëri”.

Teksa bën përgjegjës kryeministrin Rama për dështimin e reformës zgjedhore, Berisha thotë se vota e diasporës dhe shpërndarja e mandateve të deputetëve ishin detyrime që rridhnin nga vendimet e kushtetueses.

“Dy problemet e trajtuara nga përfaqësuesit e Partisë Demokratike dhe Partisë Socialiste dhe të votuara mbrëmë në parlament nuk kanë asnjë lidhje me reformën zgjedhore të rekomanduar nga OSBE-ODHIR, por vetëm me zbatimin e dy vendimeve të Gjykatës Kushtetuese.”

Me ndryshimet e reja në Kodin Zgjedhor çdo shtetas shqiptar që banon jashtë, qoftë rezident apo jo ka të drejtën e votës, me kushtin e vetëm që të ketë një adresë banimi. Sakaq partitë politike do të dorëzojnë në KQZ dy lista, ku 1/3 e do jetë e mbyllur dhe nuk do t’i nënshtrohet votës preferenciale, ndërsa 2/3 do jetë e hapur. Ndërkohë 1 në 3 kandidatë fitues nga lista e hapur duhet të jetë grua.

Klan News