Luka Modric do të jetë pjesë e Real Madrid, të paktën edhe për një tjetër sezon.

Klubi spanjoll dhe mesfushori kroat, kanë rinovuar kontratën mes tyre, deri në verën e vitit 2025.

Njoftimi zyrtar, ka ardhur nga vetë Real Madrid, në kanalin zyrtar të klubit.

“Real Madrid CF dhe Luka Modric kanë rënë dakord për të vazhduar kontratën e kapitenit tonë, i cili do të jetë i lidhur me klubin deri më 30 qershor 2025”, thuhet në njoftimin e klubit.

Në moshën 38-vjeçare, lojtari kishte vendosur ta mbyllte me “Los Blancos”, por largimi i Toni Kroos, bëri që drejtuesit t’i kërkonin qëndrimin edhe për një tjetër sezon, për shkak të eksperiencë së madhe.

Modric ka bërë 534 paraqitje për Real Madrid, duke fituar katër tituj kampionë në La Liga, gjashtë trofe të Ligës së Kampionëve, dy Kupa të Spanjës, pesë Superkupa të Spanjës, katër Superkupa të Evropës dhe pesë Kupa të Botës për klube.

Gjatë 534 paraqitjeve me madrilenët, Modric ka shënuar 39 gola dhe 86 asistime, ndërsa ka fituar edhe “Topin e Artë”. /tvklan.al