Në çdo pikë të One Albania, kemi parë të shkruar me ngjyrë vjollcë “5G”. Në fakt 5G është risia që kompania One Albania sjell në Shqipëri. I ftuar në studion lëvizëse të “Aldo Morning Show” në Tv Klan mëngjesin e kësaj të mërkure ishte CEO i kompanisë, Brano Djurovic.

Ai është më origjinë nga Mali i Zi dhe në studio foli pak sa i takon përshtatjes së tij në vendin tonë. Brano Djurovic tha se i pëlqente shumë Shqipëria pasi kultura e mënyra e jetesës ishte shumë e ngjashme me atë të vendit të tij.

Sa i takon pjesës profesionale ai ndau për publikun më tepër informacione rreth rrjetit 5G në Shqipëri. Sipas tij 5G synon që të rrisë shpejtësinë me 1Gb/sekondë. Djurovic shtoi se përveç Tiranës, Durrësit dhe veriut të Shqipërisë, One Albania synon që rrjetin 5G ta shtrijë dhe në pika të tjera shumë të rëndësishme në të gjithë vendin.

 “Sot ka dy mënyra se si mund të aksesojmë në 5G. Ka dy elementë një është mbulimi 5G. Jemi prezentë në Tiranë, Durrës dhe në veri të Shqipërisë. Shumë shpejt do të zgjerohet duke mbuluar pjesë shumë të rëndësishme të Shqipërisë. Një element tjetër janë pajisjet pasi juve do iu duhet një telefon tjetër 5G. Por, unë besoj se sot edhe modele më të thjeshta mund ta aksesojnë, jo domosdoshmërish më të shtrenjtat apo më të fundit. Praktikisht me përdorimin e 5G-së ju do të keni shpejtësi më të lartë me gati 1 Gb/sekondë.”

Gjithë bota i ka kthyer sytë nga teknologjia dhe digjitalizimin dhe kjo nuk kishte se si t’i shpëtonte One Albania. CEO i kompanisë thotë se po i kushtohet një vëmendje e veçantë digjitalizimit në raport me shërbimin ndaj klientit.

“Digjitalizimi është në fakt një prioritet kombëtar jo vetëm i One Albania. Dhe në industrinë tonë kemi një qasje të orientuar më shumë drejt personales. Të ketë një përvojë personale qoftë nga dyqanet tona, qoftë nga shërbimet. Por, ne po përpiqemi gjithnjë e më shumë që të ketë një reduktim të kontaktit profesional, pra njerëzit të kenë gjithnjë dhe më pak nevojë që të shkojnë nëpër dyqane dhe të kenë gjithnjë e më shumë shërbime digjitale.”/tvklan.al