“Udha e Shkronjave” – Luljeta vs Arben

“Kujdes shëndetin” – Kirurgjia e kraharorit, Liv Hospital

“Ka një mesazh për ty” – Humbi 5 familjarë, rilindja e Kelit

Rrëfimi rrëqethës i Kelit: Tërmeti i 45 viteve më parë më mori 5 familjarë, mes tyre gruan e fëmijët

Një mëngjes Pashkësh 45 vite më parë, familja e Kelit në Shkodër u zgjua, shkëmbeu urimet por krejt papritur ndodhi një fatkeqësi. 5 prej tyre humbën jetën tragjikisht në të njëjtën ditë për shkak të tërmetit të tmerrshëm të 15 prillit 1979. Keli, i  cili është një prej të mbijetuarve rrëfen në “Ka Një Mesazh  Për Ty” nga “E Diela  Shqiptare” në Tv Klan orët e agonisë së tragjedisë që i mori familjen.

Keli:Në datën 15 prill 1979 në rrethin e Shkodrës ka rënë  një tërmet i rëndë, 6.7 ballë. Aty në fshatin tonë, e ka rrafshuar komplet fshatin, i ka rrafshuar të gjitha shtëpitë në tokë. Prej këtij fshati kanë qenë 15 viktima atë ditë. Ndër 15 viktima, 5 viktima kanë qenë të familjes time.

Ardit Gjebrea: Në çfarë ore ndodhi?

Keli:Ka qenë ora 7 e gjysmë, mëngjes.

Ardit Gjebrea: Ju ishit zgjuar?

Keli:Po, ishim zgjuar. Ne kemi qenë një  familje e madhe prej 17 vjetësh. Atë ditë, se unë jam katolik, ne besojmë, atë ditë për ne ka qenë një festë, e diela e Pashkëve. Kooperativa bujqësore e ka bërë aksion atë ditë, të dilte gjithë populli në punë, mos të merrej më shumë se ashtu ka qenë sistemi.

Ardit Gjebrea: Pra  atë ditë sistemi i asaj kohe që ju mos të festonit e bëri ditë aksioni që ju të shkonit në aksion dhe të punonit. Ndërkohë ju u zgjuat në mëngjes, i bëtë urimet e festës apo jo?

Keli:  Atë ditë, e kishim zakon që të çoheshim në mëngjes të tërë, të hanim mëngjesin dhe pasi të hanim mëngjesin të gjithë, u çuam, u nisëm për të dalë. Pa dalë nga shtëpia, ia filloi tërmeti. Valët e tërmetit ishin jashtëzakonisht të rënda. U shemb shtëpia dykatëshe, u këput muri gjysmë metër mbi tokë dhe u hapën përjashta. Unë isha në kuzhinë me gjithë grua e dy fëmijët, kisha edhe dy pleqtë aty. U çova në këmbë, kapa gruan, gruaja djalin e vogël në krah, kapa djalin e madh për dore për të dalë jashtë, s’kishim ku të dilnim këtej dhe valët e tërmetit ishin kështu (bën shenjë përpara) se trupi i njeriut shkonte sipas valëve. Si përfundim, tavani ra kati i dytë mbi katin e parë, na zuri nën të, s’mundeshim të dilnim, si përfundim u kthyem përmbys e na zuri  komplet brenda. Unë për sekonda s’mundesha të merrja frymë se kur s’mundesh të frysh barkun nuk mundesh të ngopesh me frymë, isha duke dhënë shpirt. Kisha gruan përkrahu, djalin e vogël, djalin e madh, ishim shtrirë të tërë. Në këtë kohë trupi im ishte më lart se trupi i gruas dhe aty ku ishte gruaja  ishte më lirshëm, nuk kishte peshën time.

Ardit Gjebrea: Sa vjeç ishin fëmijët e tu?

Keli:Djali i madh ka qenë 4 vjeç e gjysmë, i vogli 8-muajsh, gruaja 25 vjeçe. Në këtë kohë, unë s’mundesha të flisja, isha duke dhënë shpirt. Flet gruaja, “aman Kel, mundesh të bësh diçka të dalim  jashtë se mbaruam me gjithë fëmijë?” Zoti i madh atje se çfarë bëri nuk e di, veçse kur foli kjo më foli zemra mua, i thashë vetes u thyen binarët, u larguan gurët, la zhavorrin brenda, kam nxjerrë krahët, jam munduar të dal jashtë, e kam nxjerrë trupin me zor. Unë duke dalë dhe zhavorri e guri duke hyrë në vendin tim. Kur dola unë jashtë ia bëra më keq kësaj, u mbyll komplet e u bllokua kjo brenda.

Ardit Gjebrea: Gruaja?

Keli:Gruaja.

Me shumë mundim, pasi doli jashtë Keli shihte vetëm gërmadha e shkatërrim. Nën to do të zbulonte edhe humbjen e paimagjinueshme.

Keli:Vëllai kishte marrë për të dalë jashtë prej derës tjetër, e kishte zënë muri jashtë. Djali i vëllait,  e kemi gjetur te dera, e kishte kapur në krah dhe kishte rënë me gjithë djalin në krah, muri sipër, e gjetëm në oborr jashtë.

Ardit Gjebrea: Ti e humbe edhe gruan, edhe dy fëmijët?

Keli:Gruan e dy fëmijët. Madje djalin e madh e kanë gjetur shokët, tërë atë kuzhinën e kanë marrë  me lopatë në atë kohë, ka qenë 1 metër gur e rërë. Ai më kishte ikur mua prej dorës, kishte shkuar të hynte në një derë tjetër për të hyrë në shtëpi të madhe. Aty e kishte zënë, aty kishte mbetur dhe s’e kemi gjetur deri në orën 12. Në orën 12 e kanë gjetur ata shokët.

Keli shton se për vite e kaploi ndjesia e fajit që ai kishte mbijetuar por jo fëmijët e tij.

Krijoi familje sërish pas humbjes tragjike të së parës, Keli tregon historinë e emrit të djalit

45 vite më parë, 5 nga familjarët e Kelit humbën jetën për shkak të tërmetit të prillit 1979 në Shkodër. Mes tyre ishin edhe gruaja e dy djemtë, 4 vjeç dhe 8-muajsh. Në rrëfimin që ndau me “Ka Një Mesazh Për Ty” nga “E Diela Shqiptare” në Tv Klan Keli foli për dhimbjen, ndjesinë e fajit dhe mendimin se për të nuk do të kishte një rrugë tjetër.

Me këmbënguljen e familjarëve e të afërmve, ai kërkoi sërish dikë për të ndarë jetën. Fati e takoi me Rexhinën që gjithashtu e njihte dhimbjen e humbjes së një të afërmi pasi vëllai i saj kishte ndërruar jetë në moshën 25-vjeçare nga një aksident.

Nga ai moment, jeta e të dyve ndryshoi edhe pse dhimbja mbetej gjithnjë e pranishme. Për ta lehtësuar disi, Keli pati njëë kërkesë për Rexhinën që ajo s’ngurroi t’ia plotësonte.

Keli: U bashkuam,  filluam jetën me Rexhinën,  jashtëzakonisht mirë. Unë kisha shumë raste që më shkonte mendja, më kujtoheshin ata, s’harrohen, janë 40 e ca vjet dhe akoma sot i kam në mendje, më kujtohen si atë ditë. Çfarë ka bërë Rexhina për mua nuk e bën kush. Ajo më është gjendur në çdo orë,  në çdo minutë gjithmonë afër. Më ka pëërkëdhelur, më ka përshëndetur, më ka hequr mërzinë, më ka folur fjalët më të mira. Më ka dashur, më ka respektuar, s’më ka rënë kurrë ndesh.

Ardit Gjebrea: Ia kujtoje Rexhinës familjen tënde, flisje për këtë gjë apo preferove që mos ta përmendësh më?

Keli: Dashje, pa dashje mua më kujtohej sa herë. Mundohesha mos ta kujtoja shumë, por sido të ishte mua më thoshte zemra sa herë, më dilnin lot,  më merrte malli dhe e kam patur gjithnjë afër, krah i dajthtë gjithmonë.

Ardit Gjebrea: Krijove familje me Rexhinën? 

Keli: Po, Rexhina, përveçse ai Zot i madh bëri mrekulli e më nxori mua një njeri si Rexhinën, më dhruoi edhe një familje të dytë, më dhuroi dy fëmijë, dy djem ashtu siç i kisha pasur përpara.

Ardit Gjebrea: Në momentin që lindi djali i parë, të shkoi mendja që t’i vendosje një nga emrat e dy djemve?

Keli: Po, edhe kjo ka ndodhur. Kur lindi djali i parë, me thënë të drejtën, pak me vështirësi por vendosa t’i bie në qafë Rexhinës, t’i lutesha, a ka mundësi,a të vjen keq t’ia vë emrin se kam dëshirë t’ia vë emrin të paktën njërit? Ajo me gjithë qejf e dha mendimin e saj dhe ua vumë emrin atij të madhit emrin atë ditë dhe Rexhina s’pati asnjë të keqe me mua.

Dashuria që lindi nga dhimbja: Më dhe dorën për të filluar një jetë të re për të dytën herë

Dashuria e Kelit dhe Rexhinës ka lindur kur fatet e tyre u lidhën nga dhimbja. Keli kishte humbur gruan, dy fëmijët, vëllain dhe nipin nga tërmeti i prillit 1979 në Shkodër, ndërsa Rexhina vëllain 25-vjeçar nga një aksident gjatë punës.

Mes dhimbjes ata gjetën një shpatull te njëri-tjetri dhe arritën  të krijonin një familje të re. Keli ndien se asgjë nuk mjafton për ta falenderuar Rexhinën për atë që ajo ka bërë për të ndaj e ka ftuar në “Ka Një Mesazh Për Ty” nga “E Diela Shqiptare” në Tv Klan.

Keli: Sot të kam thirrur këtu për të të falenderuar para të gjithë njerëzve, për të diktuar botërisht se çfarë ke bërë ti për mua, çfarë sakrifice, çfarë guximi ke marrë ti. Unë për vete kam qenë një njeri i rrënuar, i sakatuar, i humbi familja, i humbën shpresat krejt prandaj në kohën që jemi bashkuar bashkë ma ke dhënë dorën për të filluar një jetë të re për së dyti herë. Ti je gjëja më e shtrenjtë për mua, ti je bota për mua.

Rexhina: Faleminderit shumë! Unë nuk kam bërë  kurrgjë, kam bërë vetëm detyrën. Keli ka qenë në një situatë shumë të trishtë, shumë të rëndë, shumë të vështirë dhe familjarët e tij, ama Keli mbi të tëra. Kur jam njohur me Kelin, edhe unë kam pasur një fatkeqësi dhe përmes asaj fatkeqësie jam njohur me Kelin dhe me thënë të drejtën, siç të thashë më përpara, unë e kam kaluar jetën shkëlqyeshëm me Kelin. Kemi qenë një çift që jemi marrë vesh se ne bënim shumë diferencë moshe me njëri-tjetrin, por ai është bërë shumë herë në moshën time dhe unë shumë herë në moshën e tij. Jemi munduar t’i fshijmë lotin njëri-tjetrit më mirë të themi prej ngjarjeve që kemi pasur në jetë, por ka dashur Zoti që pas tërë asaj  fatkeqësie që Keli ka pasur dhe unë kam pasur, na kanë ardhur dy fëmijë të mrekullueshëm në jetë, kemi një familje të shëndoshë dhe të mrekullueshme, dy nuse që nuk mund t’iu them nuse por iu them vajzat tona se ne nuk kemi vajza, ato janë vajzat tona për ne. Kelin e falenderoj fort që ka bërë këtë surprizë, më ka emocionuar shumë dhe tani po dridhem.

Ardit Gjebrea: Do ta keni kujtim shumë të bukur.

Rexhina: Shumë faleminderit! Ne kemi bërë vetëm detyrën si bashkëshortë.

“Ka një mesazh për ty” – Dashuria nuk del në pension

Një mësues i rrallë, prindërit dhe ish-nxënësit kujtojnë gjestet e mirësisë së Shpëtimit

Mësuesi i parë është një ndër figurat më të rëndësishme për një fëmijë që mbetet gjithnjë në kujtesën e tij. Shpëtimi është një prej mësuesve që ka ditur si të ngulitet thellë në zemrat e kolegëve, nxënësve por edhe prindërve të tyre.

Ditën e hënë ai  del në pension dhe Hysniu, Amelia, Brunilda, Dhimitri, Sara kanë ardhur në “Ka Një Mesazh Për Ty” për ta falenderuar për gjithçka. Për të na njohur pak më mirë me të, secili prej tyre ndan me rubrikën e së “Dielës Shqiptare” në Tv Klan disa gjeste mirësie të profesor Shpëtimit.

Brunilda: Marrëdhënie shumë, shumë e shkëlqyer me të dy. Unë jam shumë e privilegjuar me thënë të drejtën sepse kam pasur të dy fëmijët me mësues Shpëtimin si Dhimitrin, edhe Sarën dhe mendoj se është një profesor i pazëvendësueshëm sepse zakonisht kur mbaronte shkolla dhe fëmijët ishin nëpër shtëpi, mësues Shpëtimi nuk na thërriste ne prindërit ose fëmijët që të shkonin të merrnin dëftesat, por vinte dhe na i sillte vetë në shtëpitë tona. Jo vetëm ky, por kanë qenë shumë raste të tjera që mësues Shpëtimi më ka bërë të ndihem shumë mirë si prind sepse shkonte në mëngjes herët dhe i ndizte zjarrin fëmijëve…

Ardit Gjebrea: Vërtet?

Brunilda: Po. Kur fëmijët ishin të lagur, ai i rrethonte pas stufës që të thaheshin. Ka bërë shumë e shumë të tjera.

Ardit Gjebrea: Po Amelia?

Amelia: Unë personalisht kam shumë kujtime të bukura dhe momente të veçanta me mësues Shpëtimin. Në vitin 2015 kalova një periudhë të vështirë shëndetësore. Rashë nga një ndërtesë e vjetër, pësova një dëmtim serioz në këmbën e djathtë për të cilën m’u desh një muaj rikuperim dhe mësues Shpëtimi sapo mësoi për gjendjen time, ka ardhur për të më takuar dhe që unë mos të mbetesha prapa në mësime vinte çdo ditë në shtëpinë time pasi mbaronte punën për të më bërë çdo orë që unë humbisja dhe është vërtet për t’u vlerësuar një gjest i tillë pasi profesori e ka bërë edhe me shumë nxënës të tjerë ndër vite me shumë dashuri dhe përkushtim. Babi im ka qenë gjithashtu një ndër nxënësit e parë në fillimet e karrierës së mësuesit në shkollën e vendlindjes sonë…

Ardit Gjebrea: Vërtet? Domethënë edhe babi ka qenë nxënës i tij, edhe ti je nxënëse?

Amelia: Po. Ndihemi shumë krenarë. Babi shpesh më tregon, mban mend një gjest të veçantë që  mësuesi ka bërë për ta. Një ditë i ka ftuar nxënësit në shtëpinë e tij, një ndër ta ishte edhe babai im dhe duke ditur të gjitha vështirësitë e jetesës, ai u ka dhuruar secilit nga nxënësit një palë çorape, këpucë, çanta shkolle, rroba të ndryshme për t’i lumturuar sado pak. Babai im e kujton gjithmonë dhe i është mirënjohës gjithë jetën dhe ndihemi të dy krenarë që ai ka qenë mësuesi ynë i parë dhe prind i dytë për ne.

“Pension të lehtë!”/ Mësues Shpëtimi mbyll rrugëtimin e tij me një surprizë speciale

Dalja në pension për mësues Shpëtimin do ta bëjë që t’i mungojnë zhurmat e nxënësve, por do të shënojë edhe një kujtim të bukur. Ish-kolegu i tij, Hysniu, ish-nxënësit Amelia, Dhimitri dhe Sara si dhe Brunilda që është nëna e këtyre dy të fundit kanë ardhur në “Ka Një Mesazh Për Ty” për t’i dhënë disa falenderime zemre.

Gjatë rubrikës së programit “E Diela Shqiptare” në Tv Klan ata theksuan veprat e tij të mira, punën e palodhur me nxënësit dhe mirësinë e vazhdueshme që ka treguar ndaj kujtdo. Secili prej tyre ka një falenderim dhe vlerësim të veçantë për mësues Shpëtimin.

Hysni: Shpëtim!

Shpëtim: Urdhëro!

Hysni: Kënaqësia është shumë e madhe që ta bëjmë këtë surprizë sepse ti me të vërtetë e meriton. Është nder dhe në fund të them atë që më pate thënë se “Hysni, sa shpejt dole në pension!” Më duket se të erdhi radha dhe “pension të lehtë” them unë tani.

Shpëtim: Faleminderit shumë!

Hysni: Vështirë do e kesh një vit sa për dijeni.

Shpëtim: Them se do i rregullojmë gjërat.

Brunilda gjithashtu pati një falenderim dhe vlerësim për bashkëpunimin e tij me prindërit. Ajo shprehu se sa shumë do i mungojë profesori Sarës së vogël, sytë e së cilës janë mbushur me lot.

Brunilda: Desha të të falenderoj për Dhimitrin dhe Sarën. Sara është shumë e prekur sepse gjithmonë të  ka pasur shumë afër.

Shpëtim: Ua kam premtuar që do vijë një tjetër më i mirë apo e mirë.

Brunilda: Po, por ti e di që ajo i ka pasur një çikë më të mira marrëdhëniet.

Dhimitër: Nuk ka më të mirë se ti!

Shpëtim: Faleminderit!

Më pas, erdhi radha e Dhimitrit dhe Amelias.

Dhimitër: Nuk do lëmë pa harruar të gjitha sakrificat që ke bërë për ne, jo vetëm për klasën e Sarës dhe timen, por edhe për të gjithë brezat që ke kaluar dhe ke qenë shumë mësues i mirë, i sjellshëm dhe shumë korrekt.

Amelia: Unë doja të të falenderoja nga zemra mësues Shpëtimi për gjithçka që ke bërë për të gjithë pasionin që ke bërë për detyrën tënde të shenjtë.

Surpriza nuk mbaroi me kaq pasi përqafimit iu bashkuan edhe shumë nxënës të dikurshëm të profesor Shpëtimit, nxënës aktualë si dhe kolegë të vjetër e të rinj duke ‘vulosur’ një fund plot dashuri për karrierën e tij.

“Shihemi në gjyq” – Fut burrin në burg, i grabit edhe shtëpinë

“Gruaja zbriti nga kati i dytë me çarçaf në 3 të mëngjesit”, Nikolini tregon si e gjeti veten të arrestuar

Nikolini, i cili vjen në “Shihemi në Gjyq”  për një konflikt me motrën, Besianën thotë se nuk ka gjetur qetësi që prej vitit 2021. Ai nis të tregojë për rubrikën e së “Dielës Shqiptare” në Tv Klan se është divorcuar për shkak të diskutimi verbal.

Më tej, ish-gruaja ka dalë nga shtëpia në orët e para të mëngjesit duke përdorur një çarçaf, ka hyrë në shtëpinë e fqinjit dhe ka telefonuar policinë që ka arrestuar Nikolinin.

Nikolin: Që në 2021 unë kam qenë i martuar dhe jam i divorcuar. Problemet kanë nisur për një debat komplet verbal që nuk meriton të diskutohet dhe bashkëshortja ime më bëri një denocnim në Policinë e Rrethit Mat, të cilët më arrestuan dhe zonja për t’u viktimizuar se gjoja unë isha person i rrezikshëm dhe kisha bërë gjithë këto rrezikshmëri në familje, unë ia kam plotësuar të gjitha kushtet asaj dhe gjithë pjesëtarëve të mi të familjes, ka zbritur nga kati i dytë me çarçaf në tokë, zonja, për t’u viktimizuar se nuk e kishte nga kushtet.

Eni Çobani: Në çfarë ore të lutem, me çarçaf?

Nikolin: Me çarçaf ka zbritur rreth orës 3 të mëngjesit.

Eni Çobani: Ju ishit në gjumë të gjithë?

Nikolin: Unë isha në gjumë, e lamë si debat. Unë i kërkova një sqarim ç’është kjo përgjigje moj zonjë thashë unë që më tha “nuk jam shërbëtorja jote”. Po unë që jam gjithë ditën në punë me beton? “E ke për detyrë se je kryefamiljar”.

Eni Çobani: Dhe vetëm nga kjo fjalë zonja shkon, bën një urdhër mbrojtjeje dhe ti përfundon në burg. Po ti ku e kishe gojën se më fal tani?

Ardit Gjebrea: Po pse duhet të zbriste ajo, kishe mbyllur derën me çelës ti?

Nikolin: Dera ishte e hapur, për t’u viktimizuar se ajo ka thënë edhe në polici kisha frikë se më dëgjonte e nuk më linte të dilja. Largohet nga banesa, shkon te komshiu afër që nuk i kemi marrëdhëniet e mira historikisht me ta për konflikte pronash se të parët e kështu, dhe njofton policinë. Në orën 5 të mëngjesit arrestohem në komisariatin e policisë Burrel.

Ish-gruaja e futi në burg, por sërish tentoi të shpëtonte martesën: Respektoja kanunin

Në vitin 2021 Nikolini u arrestua nën akuzën e bashkëshortes për “dhunë në familje”. Siç shpjegoi në “Shihemi në Gjyq”, një mbrëmje debatoi me ish-gruan, më pas në  orën 3  të mëngjesit ajo zbriti nga kati i dytë me çarçaf dhe shkoi në shtëpinë e fqinjit me të cilin nuk kishin marrëdhënie të mira. Nga aty ka telefonuar policinë dhe ka thënë se është dhunuar, gjë që ka sjellë arrestimin e Nikolinit dhe dënimin e tij me 16 muaj burg.

Ndërmjetësja e rubrikës së “E Diela Shqiptare” në Tv Klan, Eni Çobani përmend edhe një detaj tjetër. Pavarësisht gjithçkaje, Nikolini ka provuar sërish që ta shpëtojë martesën dhe të mos shkojë drejt divorcit. Ai ka dërguar njerëz në shtëpinë e ish-vjehrrit, Simon Lleshit që të gjenin gjuhën e përbashkët.

Nikolin: Në bazë të kanunit, siç kishim bërë miqësinë se kur u njoha me të më tha “jam me kanunin, nuk ta jap për kafe që të dalësh të pish kafe, nuk ta jap për festa, nuk ta jap për raste të tilla kështu, veç kur ta marrësh njëherë e mirë”. Me kanun, unë i ndenja se e njihja edhe unë.

Ardit Gjebrea: Pra në qoftë se vjehrri ia dha me kanun, u detyrua që të respektonte edhe kanunin.

Nikolin: Në këtë rast që më ndodhi mua, zotëria nuk më përgjigjet as me kanunin, as me ligjin, as si burrëri, në asnjë lloj drejtimi.

Ardit Gjebrea: Po çfarë bëri?

Nikolin: Nuk më jep përgjigje. Unë i kam çuar njerëz, edhe gjatë kohës që isha në burg, i kam çuar njerëz të merremi vesh, të pajtohemi, nuk m’i ka pranuar.

“Më kthe sendet e mia ose një pjesë të shtëpisë”, Çobani i pret hovin Besianës: Harroje!

Besiana i kërkon vëllait të saj, Nikolinit që t’i kthejë sendet e saj që ajo kishte lënë në shtëpinë e tij. Sipas shpjegimit të tyre në “Shihemi në Gjyq”, sendet qëndronin në një dhomë në shtëpinë e Nikolinit dhe janë marrë nga ish-bashkëshortja e tij.

Eni Çobani, ndërmjetësja e rubrikës së “E Diela Shqiptare” në Tv Klan theksoi se ngjarja ka ndodhur gjatë kohës kur Nikolini shlyente dënimin me burg pasi u akuzua nga ish-bashkëshortja për dhunë në familje. Besiana thotë se gjithsesi përgjegjësia i mbetet atij dhe kërkon që vëllai t’i japë 15 mijë euro si dëmshpërblim ose shtëpinë, por merr një përgjigje të prerë nga Çobani.

Eni Çobani: Shtëpinë njëherë harroje se nuk e merr. Jo, shtëpinë nuk e merr ti.

Besiana: Do ta marr me ligj.

Eni Çobani: Shtëpinë e këtij punëtorit këtu që e ka bërë atë tullë më tullë ti nuk e merr, ti nuk e merr atë shtëpinë. Ato kutitë që i ke pasur të mbyllura ti dhe që s’e dimë se çfarë ke pasur brenda, as ato, prit njëherë do na thuash çfarë ke pasur brenda, do të shkojmë te Simon Lleshi dhe Simon Lleshi po na ndjek.

Besiana: Po, do t’i them të gjitha.

Më pas, Çobani iu drejtua ish-vjehrrit të Nikolinit, Simonit duke i bërë thirrje të kthejë sendet e Besianës.

Eni Çobani: Simon, me gjithë respektin, pavarësisht se nuk të njoh, në qoftë se ke marrë gjëra që nuk i takojnë vajzës tënde, Elisabeta Lleshi, të paralajmëroj për t’i kthyer ato në banesën ku i ke tërhequr dhe nga ai moment t’i dorëzohen zonjës që pretendon që i ka të vetat.

Besiana: Po ka 3 vite zonja Eni që ato janë përdorur, ato tani nuk bëjnë më. Lekë i dua. Zonja mund t’i ketë përdorur ato. Nëse ato janë të reja, në kuti ashtu siç unë i kam lënë, ashtu do t’i marr, përndryshe unë i dua në vlerë leku nga zonja Elisabeta ose zoti Simon Lleshi ose nga zotëria këtu.

Eni Çobani: Atëherë provoje! Të bie barra e provës! Provo mallin që ke çuar. Kaq.

“Të Panjohurit” – Gazment Lushej