Policia e Tiranës ka ndaluar një 16-vjeçar, i cili akuzohet se shpërndante në rrjete sociale dhe në aplikacione të ndryshme komunikimi foto dhe video personale të një të miture.

Sipas asaj që njofton Policia 16-vjeçari i shpërndante këto materiale tek persona të ndryshëm ku blutë kanë sekuestruar aparatin celular të tij në cilësinë e provës materiale.

Ndërkohë po punohet për identifikimin e personave të tjerë të përfshirë në këtë veprimtari kriminale teksa materialet i kaluan Prokurorisë.

Njoftimi i Policisë:

Tiranë/ Specialistët e Sektorit për Hetimin e Krimeve Kibernetike, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në vijim të punës për goditjen e paligjshmërive në fushën e krimeve kibernetike, kanë ndaluar me iniciativë një shtetas të moshës 16 vjeç, për veprat penale “Pornografia me të mitur” dhe “Falsifikimi kompjuterik”, parashikuar nga nenet 117/2 dhe 186/a të Kodit Penal.

Nga veprimet hetimore të kryera ka rezultuar se 16-vjeçari ka shpërndarë materiale personale (fotografi dhe video) të një shtetaseje të mitur, në rrjete sociale dhe në aplikacione të ndryshme komunikimi, te disa shtetas të ndryshëm.

Aparati celular i 16-vjeçarit është sekuestruar në cilësinë e provës materiale dhe gjatë analizës e këqyrjes paraprake të tij janë konstatuar biseda dhe komunikime në të cilat ishin shpërndarë fotot dhe videot intime, në aplikacione elektronike të personave të ndryshëm.

Po punohet për identifikimin e personave të tjerë të përfshirë në këtë veprimtari kriminale.

Materialet i kaluan Prokurorisë.

/tvklan.al