Myrto Uzuni po bën historinë te Granada. Sulmuesi kuqezi vazhdon që të shkëlqejë me golat dhe performancën e tij në fushë. Ai ka fituar zemrat e tifozëve të skuadrës spanjolle!

Por për futbollistin e kombëtares shqiptare të futbollit ka qenë surprizë kur ka takuar Santin, një tifoz special, i cili kishte përshkuar 11609 kilometra vetëm për të parë skuadrën spanjolle si edhe idhullin e tij, Myrto Uzunin.

Dhe mbrëmja u bë edhe më speciale, kur lojtari 29 vjeçar doli jashtë stadiumit për të takuar djaloshin, i cili banon në Tukuman të Argjentinës.

Myrto Uzuni – Nga vjen, nga Argjentina?

Santi – Nga Argjentina, Tukuman!

Myrto Uzuni – Shumë faleminderit që ke ardhur! Të pëlqen Granada?

Santi – Më mrekullon Granada! Kjo është një ëndërr Myrto!

Myrto Uzuni – Paske fanellën? Shumë mirë, do ta firmos!

Në fund nuk mungoi edhe fotografia mes fansit argjentinas dhe lojtarit kuqezi.

Por surprizat nuk mbaruan për Santin dhe babanë e tij Alfonson. Ata shkelën fushën e stadiumit “Los Karmenes”, duke përjetuar emocione të mëdha. Me origjinë nga Granada, Alfonso dhe familja e tij prej 12 vitesh janë zhvendosur në Argjentinë.

Klan News