Ish-ylli i Manchester United, Anthony Martial, do të vazhdojë karrierën e tij në Greqi.

Sulmuesi ka qenë një futbollist i lirë që kur u largua nga “Djajtë e kuq” në verë, pas një periudhe nëntëvjeçare në ‘Old Trafford’.

Klubi grek i AEK-ut të Athinës njoftoi se ka firmosur me francezin, ndërsa në rrjetin social ‘X ‘shkroi se ‘magjistari po vjen’.

Futbollisti 28-vjeçar kërkohej nga disa klube, përfshirë Flamengon në Brazil. Por në fund ai pranoi ofertën e bërë nga gjigandët grekë.

Martial do të jetë pjesë e AEK-ut, ku luan edhe portieri kuqezi Thomas Strakosha për tre sezonet e ardhshme. Ai do të përfitojë në total 9 milion euro.

Ky është shpenzimi më i madh për një futbollist në historinë e klubit grek. Ndërsa ka qenë në kërkim të një ekipi të ri, francezi është stërvitur veçmas rregullisht, për të qenë në një gjendje optimale fizike.

Interesim për shërbimet e tij patën edhe Lille, Atalanta, Marseille dhe Besiktas. Tashmë atë e pret një sidë e re në një kampionat konkurrues si ai grek.

Klan News