Ky është automjeti fuoristradë tip Porsche që u përdor në vrasjen e 48-vjeçarit Lulzim Visha, mëngjesin e 24 Janarit, në Zall Mner të Kamzës.

Klan News ka mësuar se hetuesit kanë përfituar nga kemarat e sigurisë pamjet e kësaj makine para dhe pas ngjarjes së rëndë, por ende nuk është bërë e mundur të përfitohen të dhëna konkrete për 2 personat që dyshohet se morën pjesë në këtë vrasje.

Ky automjet rezultoi i denoncuar i vjedhur në 2022 në Elbasan. Ai u gjet i shkrumbuar pas vrasjes së bashku me armën e krimit, në zonën e Zall Herrit.

Pista kryesore e hetimit është ajo e konflikteve që Lulzim Visha ka pasur në të shkuarën.

Këto konflikte janë pohuar dhe nga familjarët e tij përpara oficerëve të policisë. Mësohet se ata kanë pasur një konflikt për pronat me fisin Lami.

Gjatë kontrolleve strukturat e rendit, kanë shkuar edhe në banesën e familjes Lami, në Zall Mner. Uniformat blu të Tiranës sekuestruan një armë zjarri automatike me silenciator dhe municion luftarak. Në pranga është vënë Eduart Lami dhe është shpalur në kërkim Ervis Lami.

Klan News