Teksa Gjykata Kushtetuese pritet të shprehet nëse përgjimet e Sky ECC dhe EncroChat përbëjnë provë për të dënuar apo jo personat që i kanë përdorur, Sali Berisha hodhi akuza të forta për ndërhyrje të organizatave kriminale se po bëjnë gjithçka kundër legjitimitetit të këtyre regjistrimeve.

“Në Gjykatën Kushtetuese vetëm nga një person, një bandë, janë derdhur rreth 6 milionë Euro. Por përveç ndërhyrjeve të bandave, ndërhyrje po bëjnë qeveritarët të cilët në skuta takohen me gjykatësit, si Ulsi Manja, Agaçi e të tjerët, të cilët kërkojnë deligjitimimi e dokumentacionit që e ka njohur si legjitim Gjykata Ndërkombëtare e të Drejtave të Njeriut”.

Berisha shkoi edhe më tej në akuza, kur tha se përgjimet e kriptuara janë vënë në dyshim edhe nga kreu i SPAK-ut, ndaj ai kërkoi nga vendet anëtarë të BE-së që të ushtrojnë presion për zbatimin e vendimit detyrues, të dhënë më herët nga Gjykata Ndërkombëtare e Strasburgut lidhur me këtë çështje.

“Ndërhyrje me regjistrime intime po bën edhe Altin Dumani me organizatën e tij kriminale, sepse deklarata që ai bëri se kemi probleme mes legjislacionit francez dhe atij shqiptar, unë i them këtij mercenari se midis vendimeve të Gjykatës së Strasburgut dhe legjislacionit shqiptar nuk ekziston asnjë problem, sepse prevalon gjykata ndërkombëtare mbi gjykatën kombëtare, por ky është një bandit që nuk njeh ligj e Kushtetutë. Kjo është një mundësi për BE-në dhe shtetet e saj anëtare, përfshirë Gjermaninë, të mbajnë një qëndrim të qartë dhe të ushtrojnë presion ndaj autoriteteve shqiptare”.

Një ditë përpara protestës-marshim të thirrur nga opozita, krerët e të cilës paralelisht me konferencën virtuale të Berishës ndodheshin në selinë blu, lideri i demokratëve u bëri thirrje qytetarëve për pjesëmarrje masive, ku opozita do të bllokojë lëvizjen në 5 akse në kryeqytet’ atë tek Bashkia, Sheshi “Wilson”, Pallati me Shigjeta , Zogu i Zi dhe ura te Xhamia.

“Nga të katër anët sirenat e ndryshimit, sirenat e fitores së opozitës po ushtojnë. Këto sirena kërkojnë nga ne, qytetarët opozitarë, të meritojnë plotësisht këtë fitore me aksionin tonë, me veprimin tonë, me mosbindje civile. Është radha jonë”.

Pa komentuar nuk la edhe mungesën e opozitës në konsultimet me kreun e shtetit, duke e cilësuar të paracaktuar datën e zgjedhjeve.

“PD është e sigurt që Haram Bego, e kam quajtur njëherë dhe nuk do ia heq më, do përcaktojë atë që i thotë Edi Rama. Por, në rast se ekspertët tanë e gjykojnë se për votën e shqiptarëve jashtë vendit, ne nuk kemi kundërshti për të gjetur kohën më të përshtatshme, por të garantoj se Haram Bego, për të zmuthuar lidhjen me Begon tjetër, njëri e vë Begaj, tjetri Bego, i ndryshojnë këta mbiemrat, por mbiemrat e tyre nuk janë puna ime, pra ai cakton vetëm datën që i thotë Edi Rama”.

Kreu i demokratëve tha se Strasburgu e ka klasifikuar rastin ‘Berisha’ si të rëndësishëm, duke i dhënë përparësi në shqyrtim padisë së bërë nga avokatët e tij.

Tv Klan