“Plug and Play”, platforma e mirënjohur globale për mbështetjen e Startup-ve, me qendër në Shtetet e Bashkuara të Amerikës mbërrin edhe në Shqipëri, duke çelur këtë të premte dyert në ambientet e Piramidës në Tiranë.

Kryeministri Edi Rama në fjalën në ceremoninë e çeljes së këtij aktiviteti tha se askujt nuk do t’i shkonte ndërmend se një event i tillë do të mbahej në Tiranë duke e cilësuar si një gur shumë të rëndë kilometrik në rrugën e transformit rrënjësor të Shqipërisë.

Rama tha se Shqipëria është vlerësuar për sa i përket shërbimeve online, duke kryer 95% të tyre.

“Janë mbi 45 milionë qëndrime në radhë, janë mbi 45 milion rrugë për të shkuar deri tek zyra atje ku për të marrë shërbimin janë mbi 45 milionë shanse të humbura për çdo formë ryshfeti dhe bakshishi”, tha Kryeministri Rama.

Teksa nuk mungoi të ironizonte kritikat ndaj opozitës për sulmet për bashkëpunimin mes qeverisë dhe Fondit Shqiptaro-Amerikan.

“Qeveria dhe ADF-ja “janë pjesë e një grupi kriminal që ka bërë grabitjen e Butrintit”. Kështu që, nëse do të shikoni në internet Parkun arkeologjik, Amfiteatrin e Butrintit, historinë, mos u nisni atje, se “atje nuk ka gjë”. “Gjithçka është marrë edhe është çuar diku” dhe falë këtij fakti “kemi përfituar edhe shumë para që nuk dimë ku t’i çojmë, edhe i hedhim kot për këto lodrat “plug and play” dhe ça janë këto të tjerat. Po këtë mbaheni për vete, ju lutem se na kanë vënë mbrapa një kanarinë që na këndon sa herë na sheh”, u shpreh Rama.

Kryebashkiaku Erion Veliaj nënvizoi faktin se Bashkia e Tiranës do jetë donatori kryesor i këtij projekti.

“Bashkia e Tiranës do të financojë 1.8 milionë Euro për “Plug and Play”. Nuk mund të kishte një vend më ideal se Tirana për të pasur “Plug and Play”. Më vjen mirë që nga të fundit, dolëm të parët. Kjo është një provë se gjithçka mund të ndryshojë. Mund të ndryshojë një shtet, një qytet, një realitet, një ekonomi e një shoqëri. Ju faleminderit që jeni pjesë e këtij ndryshimi”, shprehet Veliaj.

Platforma “Plug and Play” është zgjeruar globalisht në mbi 60 vendndodhje, në 25 industri me më shumë se 550 partnerë. Deri më sot, ka investuar në mbi 2000 kompani me vizionin për ta bërë inovacionin të hapur për këdo, kudo. Aplikimet online për të interesuarit do të jenë të hapura deri me 16 Shkurt.

Tv Klan