Trajneri i Juventusit, Thigo Motta, foli në konferencë për shtyp në prag të sfidës me Interin, e planifikuar për tu luajtur këtë të diel.

Motta vlerësoi kundërshtarin, për të cilët tha se janë një skuadër e rrezikshme, por shtoi se ekipi i tij do të japë 200% në fushë, për të synuar një rezultat pozitiv.

“Skuadra ndihet shumë mirë, në prag të kësaj përballje. Pësuam humbjen e parë për këtë sezon në mesjavë dhe është normale që pritshmëritë të jenë të mëdha për një ekip si Juventusi.

Tani e kemi lënë pas humbjen ndaj Stuttgart dhe shohim çfarë do të bëjmë ndaj Interit. Është një atmosferë e mrekullueshme futbolli për të jetuar, ne shkojmë atje për të luajtur lojën tonë. Jemi të bindur për futbollin tonë, për idenë tonë. Interi është ndeshja jonë e radhës, një ndeshje e madhe për të luajtur, për të jetuar, gjithmonë në maksimumin tonë. Ne futemi në fushë për të dhënë 200%. Pastaj ju fitoni ose humbni, por gjithmonë përpiqeni të merrni rezultatin më të mirë të mundshëm.

Ndaj Interit do të luajmë me guxim dhe vendosmëri. Ata luajnë një futboll të mirë, të krijojnë probleme me kundërsulme. Janë një skuadër shumë e rrezikshme duhet të jemi të kujdesshëm”, deklaroi Motta.

Ndeshja Inter-Juventus është planifikuar të luhet ditën e diel, duke nisur nga ora 18:00. /tvklan.al