Rrethi i Matit ka qenë stacioni i radhës së turit “Dialog më Shqipërinë”, i ndërmarrë nga kryetari i Partisë Socialiste Edi Rama. Kreu i selisë rozë është ndalur në komunën Xibër ku në një bashkëbisedim me banorët shprehu keqardhjen për harresën  shumëvjeçare të politikës ndaj këtyre zonave.

Edi Rama: “Kur vjen në këto zona të kujtohet bukuria që vret e Migjenit, kudo bukur, sepse zoti ka bërë punë të bukur dhe kudo keq, sepse njerëzit kanë bërë punë të keqe”.

Krerët lokal të komunës por edhe vetë banorët  kërkuan që politika të mbajë premtimet e dhëna gjatë fushatave elektorale duke i kërkuar më shumë mundësi punësimi.

“Më vjen keq që asnjëra qeveri qoftë ajo e Nanos, qoftë kjo që është e Berishës zonave tona të thella nuk i kanë shërbyer. I kanë lëna pa mjek, pa shërbim mjekësor, pa infrastrukturë, pa kanale vaditëse”.

Edi Rama: “Sepse i ka humb fare vlera e fjalës dhe është kthyer politika në një cirk sharlatanësh që premtojnë çfarë ju shkon nëpër mënd dhe s’mbajnë mend më se ça kanë premtu dhe as ju shkon në mend që të mbajnë noj premtim”.

Ndër të tjera Rama u shpreh se “Dialogu me Shqipërinë”, është një bashkëbisedim për hallet dhe problemet e banorëve. Sipas tij programi i ri i qeverisë i hartuar nga socialistët do të marrë në konsideratë shqetësimet e qytetarëve në të gjithë vendin./tvklan.al

Gazetar: Neki Feta

Montazh: Renis Zela