Mediat e Koresë së Veriut njoftuan se Presidenti rus Vladimir Putin do të fillojë një vizitë dy ditore të martën në këtë vend.

Putin pritet të takojë udhëheqësin e Koresë së Veriut Kim Jong Un për të diskutuar rreth zgjerimit të bashkëpunimit ushtarak ndërkohë që dy palët po thellojnë partneritetin e tyre përballë acarimit me Uashingtonin.

Agjencia zyrtare Qendrore e Lajmeve e Koresë së Veriut njoftoi të hënën se Putin do të zhvillojë një vizitë shtetërore gjatë ditës së martë dhe të mërkurë me ftesë të Kim Jong Un. Nuk u dhanë detaje tjera rreth vizitës. Rusia e konfirmoi vizitën me një njoftim që u bë publik në të njëjtën kohë.

Kjo është vizita e parë e Putin në Korenë e Veriut në 24 vitet e fundit. Vizita vjen në një periudhë shqetësimesh të shtuara ndërkombëtare rreth një marrëveshjeje armësh përmes të cilës Pheniani e furnizon Moskën me armatime shumë të nevojshme për luftën e Putin në Ukrainë në këmbim të ndihmës ekonomike dhe teknologjisë që do të shtonte kërcënimin që bart programi i armëve dhe raketave bërthamore të Kim Jong Un.

Bashkëpunimi ushtarak, ekonomik dhe në fusha të tjera ndërmjet Koresë së Veriut dhe Rusisë është rritur dukshëm që kur Kim Jong Un vizitoi Lindjen e largët ruse në shtator për të takuar Putin, takimi i tyre i parë që nga viti 2019.

Zyrtarët amerikanë dhe të Koresë së Jugut akuzojnë Korenë e Veriut se po furnizon Rusinë me artileri, raketa dhe pajisje të tjera ushtarake, duke e ndihmuar të zgjasë luftën në Ukrainë, me gjasë në këmbim të ndihmës dhe teknologjisë thelbësore ushtarake. Pheniani dhe Moska i kanë mohuar akuzat për furnizim me armatime, gjë që përbën një shkelje të rezolutave të Këshillit të Sigurimit të Kombeve të Bashkuara./VOA